NUNOT SA ALISNGAW| Sayon kasuhan, lisud ikunbikto

HALOS  mosawop na ang adlaw kaniadtong milabay nga Domingo ug walay anino sa akong pag-umangkon nga si JB nga akong naaninaw didto sa balay sa bukid.

     Mora ug kalingkawas ang usa ka sachet nga kape nako ug ang itulak nga biskwit o dili ba loaf bread nga may palaman. Gusto nako magpasalamat sa hilum pero sa laing bahin mora pod ug kulang akong adlaw kay naandan na man gud nga modalikyat sa balay ang karaho nakong pag-umangkon.

     Pero samtang nagpakaon ko sa akong mga isda nga koi sa pag-ilog na sa kangitngit ug sa kahayag akong nadunggan nga naay motorsiklo nga mihunong sa atubangan sa gate sa akon g koral. Taudtaod lang misulog na si JB dala ang usa ka plastik nga supot.

     “ ‘Kol, naay akong gihatud sa imoha, suha ni. Seedless ug tam-is kaayo; ako natilawan.”

     Tubag nako, “Uy, unsa man na suborno? Naa kay pangayuon sa ako-a nga nagdala man ka ana?”

     “Di ‘Kol uy. Nanabong man gud ko gahapon sa hapon uban ni Garry. Igo lang mi nakatabla sa among puhonan. Pero naagi-an namo ang among classmate nga nangharvest sa ilang suha ug nagkaragada sa ilang mga bag-ong pinu-po nga mga bunga. Ako gikumedyahan nga pwede ba mi mangayo ug reject. Naunsa ba nga nagkuha man ug sako ug gisudlan hangtud napuno. Ingon niya nga iya lang to regalo sa ako-a ug ni Garry kay sa iyang tan-aw mga peldero mi sa sabong kay minghoy daw among mga nawong.”

     “Unya Jib, gihatag gyud niya ang mga pomelo? Basin ug nagkautang na hinuon ka didto sa iyaha? Kon sa bagay, duha man mo ni Garry nga mabayad kon paninglon mo sa inyong classmate.”

     Sumpay ni JB, “Di ‘Kol uy, hatag gyud na niya. Gani ingon sa akong classmate nga pwede ko motawag sa iyaha kon duna ‘koy gustong regalohan kay siya nay bahala sa suha. Di, lipay kaayo ko ‘Kol; hasta si Garry kay kada dayong niyang larga sa barko pag-adrto niya sa Manila magdala dayon na siya ug kinahon nga suha pangregalo niya sa ilang mga kaila sa opisina sa iyang agency.”

     Sumpay nako, “Ah, mao ba? Pwede pod ko mosingit ana nga sabot ninyo sa imong classmate Jib. Daghan pod ko regalohanan sa Cebu ug Manila. Ako ra man na ipadala sa ilaha. Pero naay kausa nisulti sa ako-a ang akong gipadalhan nga ugahon ang unod sa suha nga iyang nadawat.”

     “Aw, pwede kaayo ‘Kol. Kaila man pod to sa imoha kay tigpaminaw daw ilang pamilya sa dihang ikaw pa ang host sa programang Vigilantes sa radyo kaniadto. Ako lang siya tawgan kon magkinahanglan ka ug suha pangregalo.”

   “Unya karon Jibby, unsa may ato nga nagginabii man ka ug anhi sa balay?”

     Daling tubag ni JB, “Aw sama sa naandan ‘Kol, makigkulukabildo sa mga hawod sama nimo para mahibaw-an kon unsa ang mga bag-ong tsismis sa katilingban. Unya wa may bawal ‘Kol nga mangape samtang nagbaylo-ay ug mga huna-huna; labi na sa mga tsismis panglalake.”

     “Mao ba, Jibby? Pero unsa man gyud gusto nimo paminawon?”

     Tubag ni Jibby, “Gusto nako mahibaw-an unsa gyud ang posibleng sangputan ining telenobela karon nila Sen. Leila De Lima, Ronnie Dayan ug ni Kerwin Espinosa.”

     Sumpay nako sa akong pag-umangkon, “Agaron lang nato Jib kon unsa ang sunod nga mga panghitabo. Klaro na man nga giangkon sa senadora ang iyang “love affair” uban ni Dayan. Unya admitado sab nga dili bulag si Dayan ug ang iyang asawa. Mao nga sa mata sa Diyos dako nga sala na ang relasyon sa senadora ug ni Dayan. Pero kon makonbikto, kana layo pa kaayo sa tinai. Unsaon man gud Jib nga ang mga kaso nga angayan nga ipasaka batok sa duha ka mga nagdala sa

De Lima-Dayan telenovela, duha lang ka mga paribadong krimen.”

     Dugang pa nako, “Ang duha ka mga kaso Jib mao ang ‘concubinage’ kon batok kang Dayan; di pwede i-apil si Senadora. Unya isip ‘private crime’ Jib, ang mahimo lang nga mopasaka batok kang Dayan mao ang iyang asawa, wa na’y lain pa. Kon ‘adultery’ ang kaso pwede unta to ipasaka batok sa senadora. Pero ang mahimong mopasaka ani ang iyang bana lang pod. Pero ‘annulled’ na man kuno ang kasal sa senadora ug sa iyang bana. Mao nga wa nay lain pang mopasaka ana nga kaso. Gawas pa Jib, dunay mga importante nge elemento nga gikinahanglan aron makonbikto ang gikasohan sa bisan hain sa ‘adultery’ ug sa ‘concubinage.’ Duha ani nga elemento mao nga sila nagtipon na gyud sa usa ka balay ug nga ila nang gipabani-og nga sila magtiayon gyud.”

     Daling sumpay ni JB, “Unsa man na ‘Kol uy nga gibuhatan man gyud ug kalisdanan nga makunbikto ang usa ka akusado sa bisan hain sa duha ka krimen, Labi na gyud sa ‘concubinage’ ‘Kol.”

     “Naunsa man ka Jib nga ang mga naghimo sa maong mga balaod mga lakake man kasagaran. Mao na nga ila na nga gibuhatan ug lutsanan daan por sekaso nga masakpan sa mga asawa. Huna-hunaa lang Jib pila sa atong mga Senador ug mga Kongresista nga mga lalake ang dunay mga ‘didang’ karon? Naa pod na nga mga abilidad – gani mas pa – sa kaniadtong mga magbabalaod. Mas tuso pa to sila kay bisan duna nay mga tabi-tabi nga nakaabot sa ilang asawa igo man lang sila ‘deny, deny, deny until you die’ ang mga nauna nga mga maayong laki sa Kongreso ug sa larangan sa pang ‘chicks’.”

     “Sobrang swerte gyud ning mahimong politiko nga lalake ‘Kol no,” matud pa ni JB. Dugang sa akong karaho nga pag-umangkon, “Ngaliwa man gani na’ng mga yano lang mga lalake unsa na lang na’ng naa sa gahum ug daghang kwarta nga pinaspasan.”

     “Bitaw Jib, ngano man gyud nga ang mga maayong laki nga dali kaayong maka-ilad ug babaye. Gamay lang kidhatkidhat tu-a nadagit na dayon. Labi na gyud ug naay sulod kanunay ang bulsa ug di tsikot pa gyud, na, human ang balay ni amboy.”

     “Ikaw ‘Kol di ka konsehal, labi na nga di ka Kongresista ug Senador. Pero duda ko sa imoha ba. Seguro naa kay ‘Didang’ ‘Kol kay pwede man ka mapagkamalan nga politiko. Unya naa pa gyud ka sakyanan nga ‘tinted’ ang salamin. Way rason nga di ka kakuha ug ‘Didang’ ana?”

     “Hinaya imong tingog Jib; basin madunggan ka ni Auntie nimo ug motu-o to siya, na malintikan ta ani.”

     Hilabihang dako-a sa katawa sa bu-ang nakong pag-umangkon dayong sulti, “ ‘Kol, kabalo diay ka mahadlok ni ‘Tie Nene. Na diha na tika ma ‘blackmail’ ana ‘kol. Unsa man, sigi lang ta estoya ani, wa kay pakape sa ako-a?

     “Dali nakong tawag ni Misis, Ne, dalahi ra mi ni JB ug kape diri sa gawas para mopauli na ni siya kay basin maabtan na sab ni’g panihapon, hapit na ra ba.”

     “He, he, he, he, mao ra diay ni kinahanglan ‘Kol aron dali ka magpatimpla nako ug kape.”

     “Way problema Jib. Pero, unsa to giingon ni Garry nga dako mo ug daog sa sabong niadtong una pang Sabado pero didto mo nidiretso sa siga-palong sa Calinan? Unya ngano imong asawa nagreklamo ngadto kang auntie nimo nga kulang pa inyong kwarta giandam sa pagpanganak niya kay napildi ka niadtong Sabadoha?”

     “Grabeha ana ‘Kol uy, naa man ka dayon balus isyu sa ako-a. Uli na ko ‘Kol, tahi na akong baba, he, he, he di gyud ko kalusot nimo ‘Kol ba.”   -30-

Posted in Opinion