NUNOT SA ALISNGAW SA KAPE|Basin wa kahibalo ang mga pulis

KANIADTONG milabay nga Huwebes midalikyat kaming magti-ayon sa palengke aron mamalit sa mga butang gikinahanglan sa kusina sulod sa nabiling mga adlaw sa semana.

Ug samtang nagdagan ang sakyanan mikurering ang akong cellular phone. Wa nako kini gitagad sa pagtubag kay epektibo na ra ba ang balaod nga gitwag ug Distracted Driving Act. Buot ipasabot nga kon masakpan ang usa ka drayber nga naggamit sa iyang “mobile phone” samtang nagmaneho sa sakyanan dakpon kini ug mahiagum sa multa nga bali P5 mil sa unang higayon, P10 mil sa ikaduhang higayon, ug P15 mil sa ikatulo nga higayong madakpan ug tulo ka bulan nga pagsuspenso sa lisensiya. Delikado ta diha.

Mao nga sa akong huna-huna, bahala na kon si kinsang Pilato ka nga nagtawag sa ako-a pinaagi sa cellphone paghulat kon maka “parking” na ko una pa tika tubagon.

Nahilum ang telepono, apan kadali lamang kay taudtaud lang mikurering na kini pag-usab. Hapit na ko mamalikas kay gisamokan ko. Gipunit ni Misis ang akong “mobile” ug buot niyang tubagon Apan ako siyang gisanta uban ang rason nga hatagan ug leksiyon ang maong nagtawag kay siyaro ug wa siya kahibalo nga epektibo na ang Distracted Driving Law.

Mao nga human sa halos napulo ka minuto nga pagbiyahe nakakita na ko ug kaparkingan daplin sa dalan nga dili layo sa palengke. Diha-dha akong gipunit ang telepono ug gisusi kon kinsa ang nagtawag. Ang ako diay nga karahong pag-umangkon nga si JB nga tu-a karon sa Manila, nagprosesio sa iyang application para sa trabaho sa gawas sa nasud.

Akong gi-dial ang iyang numero ug dali kini nga mitubag sa akong tawag.

Naunsa man ka ‘Kol nga di na man ko nimo gitubag sa akong tawag? Mora man ug nagbinag-o na ka ba. Usa ka semana lang ko nawala sa atu-a diha sa Dabaw imo na ignoron akong tawag.”

Hilum diha Doy,” dali nakong tubag ni JB. “Unsa man, naa ka sa Manila wa na kay tan-aw ug balita sa TV; wa na kay basa-basa ug ‘newspaper’? Nagsugod na tawon Jib ang implementasyon sa balaod nga nagdili sa paggamit ug cellphone ug uban pang gadgets samtang nagmaneho ug sakyanan. Maayo unta kon imo ko pahulamon ug kwarta kon madakpan ko. Dako ra ba ang multa Doy.”

Nag drive diay ka ‘Kol? Sori kaayo ‘Kol ha wa man gud ko kabalo. Unya ‘Kol, wa ka kasugat ug pulis? Way mipara nimo nga buaya sa dalan?”

Wala kay wa man tika gitubag. Seguro nadakpan unta ko kon gitubag nako imong tawag kay sa pag kurering sa ako cellphone naay traffic policeman nga nagbarog kilid sa dalan, nagpahipi sa poste sa Davalo Light.”

Nagkatawa nga mitubag ang gwatsinanggo nakong pag-umangkon, “Sayang ‘Kol. Dapat imo gitubag akong tawag.”
“Buang ka man seguro Jib. Buot nimo ipasabot nga malipay ka kon madakpan ug makamulta ko ug singko mil pesos?”

Dili ‘Kol uy. Miingon ko nga sayang kay kon imong gitubag akong tawag unya makit-an ka sa pulis mahibaw-an unta to nato kon ang pulis mismo nahibawo nga epektibo na ang balaod. Kay sa akong pagtu-o ‘Kol maayo na lang kon adunay 50 porsento sa kapulisan nga nadestino sa trapiko ang nahibawo sa pagsugod sa implementasyon sa Distracted Driving Law ug sa mga pamaagi sa pagpatuman niini.”

Tubag nako, “Mora ug may punto ka diha Jib ha. Pero di na sab nimo malimod nga gusto gyud ko nimo makamulta kay kon gitubag nako imong tawag unya nadakpan ko, kabayad man gihapon ko ug multa.”

Ayaw lang gud kasuko sa ako-a ‘Kol. Mora man lang gud na ako-a ug pagwagtang sa mingaw diri sa Manila. Sunod semana pa man gud ako schedule sa medical unya init kaayo diri sa Manila. Kon adto ko sa mga malls aron magpabugnaw wa pud koy kwarta ‘Kol. Basin matintal ko ug makapalit wa na ko’y pangmentinar diri.”

Ikaw man gud Jib, naa na ka trabaho diri sa Dabaw di ka kuntento, Gusto nimo dako ang kita dayon.”

Lagi ‘Kol, pero naa na man gud mi anak. Bisan gamay pa na siya mora ug kulangon gyud among kita ni Misis labi na kay gigatas man. Wa man mag ‘breast fed’ akong asawa ‘Kol kay trabaho man. Sayo lakaw sa office, dugay pud pauli sa balay.”

Aw, kon mao na imong rason Jib, paghugot na lang sa imong bakus diha. Agwantaha ang kamingaw ug panagsang gutom ug kaibog sa mga maayuhon diha. Ana man gyud na kon mangita ta ug kaayohan sa kinabuhi. Ang importante determinado ka ug nga imong sagubangon ang bisan unsang pagsulay diha.”

Salamat kaayo ‘Kol sa imong pagdasig nako. Mora na baya ug kasurenderon na ko diri. Mingaw ko sa bata ‘Kol ug sa agi… “Hilom diha Doy, huna-hunaa ang kaugmaon sa imong anak ug pamilya. Ingon pa bitaw sa kanhi dakong ahente sa Sweepstakes sa unang mga katuigan Jib, ‘A winner never quits, and a quitter never wins,’ o di bah?”

Unya kalit naputol amo estorya. Nahutdan na diay ko ug load. Sori.

Posted in Opinion