NUNOT SA ALISNGAW SA KAPE| Walay angay nga isaulog?

GAHAPON sayo sa kaadlawon nako gisusi kon dunay ko’y nadawat nga e-mail gikan sa akong pag-umangkon nga si JB nga tua sa Saudi.

Pero blanko ang akong e-mail box. Wa pud ko nadawat nga mga komento sa akong lindog niining mantalaan. Mao nga nagdesisyon na lang ko nga ako na ang mag-email sa iyaha aron balitaan sa mga labing ulahi nga mga panghitabo dinhi sa Mindanao labi na gyud sa Marawi. Gusto nako nga malipay pud akong gwatsinanggong pag-umangkon nga seguro gimingaw na dinhi sa Dabaw.

Mao kini akong gi-email kang JB:

“Doy, maayong adlaw nimo diha. Seguro pagkabasa nimo ani off na ka sa imong trabaho diha sa restaurant. Sa milabay nimong e-mail sa ako-a daghan kaayo ka pangutana unsa mga katikaran dinhi sa atu-a. Balo ka Jib, mora ug mahuman na gyud ang giyera sa Marawi. Kaniadtong Martes gideklara ni President Digong nga ‘liberated’ na ang siyudad gikan sa mga teroristang grupo nga inpluwensiyado sa ISIS.

“Kini Jib human nakonpirma sa militar nga ilang napatay sa operasyon ang duha ka dagkong lider sa mga teroristang grupo nga sila si Isnilon Hapilon ug si Omar Maute. Ang Presidente gipadayon ang pagpadayag nga nakuha na pagbalik sa mga tropa sa kagamhanan ang Marawi bisan pa nga duna pay nahibilin nga mga terorista nga padayon nga nakigsangka sa kasundalohan, ug naa pay nahibilin nga mga ‘hostages’ sa ilang mga kamot.

“Pero subay sa gipamulong ni Presidente Digong Doy samtang dako nga kadaugan ang pagkapatay sa mga dagkong lideres sa mga bandido, dili kuno kini igo nga rason nga magsaulog ug maglipay. Matud ni Presidente siya mismo wa malipay sa maong kadaugan. Kini tungod kay matud niya walay midaog sa maong giyera sanglit ang mga nagpinatyanan pulos mga Pilipino. Gawas pa Jib para sa ako-a samtang tinuod nga ang direktang apektado sa pagkadugmok sa dakbayan sa Marawi ang mga molupyo sa maong dakbayang mga Muslim, dakong sakripisyo kini alang sa kagamhanan sanglit responsibilidad ani ang pagpabangon sa Marawi ug pagtabang sa katawhan nga mahiluna pag-usab sa kanhi nilang kahimtan.

“Karon pa lang Doy, ang kalkulo sa mga opisyales sa gastuhon aron marehab ang Marawi modagan gikan sa 100 ka bilyon ngadto sa 150 ka bilyon ka pesos. Grabeng dako-a sa maong pundo nga gikinahanglan. Wa pay klaro kon asa kuhaon kining kwartaha sa gobiyerno. Pero matud pa sa Iningles nga panultihon, ‘If there’s a will there’s a way.’ Busa tan-awon nato asa kutob ang makaya sa gobiyerno ni Digong. Dinhi pud nato masuta Jib kon motabang pa ba ang ubang mga nasud aron mapatuman ang programa sa rehabilitasyon sa Marawi labi na gyud to’ng nakatilaw sa balikas sa ato-ang Presidente.

“Luyo ani’ng tanan Doy, ako nagtu-o nga kon unsaong sa pagpahiluna sa mga kalihukan sa pagbangon sa Marawi, diha mamatud-an ang mga huna-huna ni Professor Zulkipli Wadi sa University of the Philippines Institute for Islamic Studies. Matud ni Wadi Jib sa usa ka interview nga gipahiluna sa usa ka telebisyon didto sa Manila, kon dili mahatagan ug pagtagad sa gobiyerno ang paglusad ug mga programa nga magsukad mismo sa kina-uyokan sa problema sa mga Muslim sa Mindanao subay sa kasaysayan, wala lang gihapon mahitabo sa panglantaw sa mga kaigsuonan natong mga Muslim. Ambisyuso man gud kaayo Jib ang mga plano sulod sa rehabilitasyon. Ang pangutana kini mosangpot ba sa kausaban sa tratamento sa kagamhanan ngadto sa mga Muslim sa Mindano? Di ba kaha ni mosangpot sa lain na usab nga pahina sa kasaysayan sa pagpamintaha sa mga Kristiyano labi na gyud kadtong mga anaa sa tag-as nga pwesto sa kagamhanan ingon man sa mga dagkong negosyante ngadto sa taga Mindanao, labi na sa taga Marawi?”

“Dugang pa ni Professor Wadi Doy, ang binhi diin naggikan ang pagtubo sa ideolohiya sa pagdumot sa mga Muslim ngadto sa mga kristiyano sukad pa kaniadtong panahon sa kolonyalismo natanom sa ilang alimpatakan tungod sa nasinati nga pagpamintaha sukad pa kaniadto ug hangtud karon. Mao nga matud pa ni Professor Wadi, posibli nga husto ang Presidente sa pagdeklara sa ‘liberation’ sa Marawi gikan sa mga terorista, pero kini sa pisikal lang nga bahin sa Marawi. Ang wa pay kaseguro-an mao ang pagkaluwas sa maong dakbayan o bisan gani sa tibuok Mindanao gikan sa kahigayonan nga lain na usab nga teroristang grupo ang mosulbong pagbalik ug mao na usab ang maglusad ug pagpangatake sa Marawi ug uban pang mga dapit dini hi ato-ng Mindanao.

“Pasidaan ni Professor Wadi Jib kon mahitabo kini mamahimong mas grabe pa kay sa nahitabo sa Marawi ug nga kon dili mabantayan mahimong mokuyanap sa ubang dapit dinhi sa Pilipinas. Mag-ampo na lang ta ug maayo ani Doy. Unta kumpleto na gyud ang pagkahanaw sa mga terorista sa Marawi ug sa ubang mga mga dapit sa isla nga kadaghanan sa mga molupyo mga kaigsuonang mga Muslim.”

Sa akong panaghap dako ang posibilidad nga malipay pud akong gwatsinanggong pag-umangkon sa maong katikaran. Sayud man gud ko dako pud iyang kabalaka sa mga nanghitabo dinhi sa ato-a sa Mindanao.

Posted in Opinion