NUNOT SA ALISNGAW SA KAPE| Pamaagi sa kampanya batok ilegal nga druga

WA KO makaseguro kon nakasimhot ba ug balita ang akong pag-umangkon nga si JB nga molarga ko sa Cebu niadtong milabay nga Domingo.

     Miabot man gud siya didto sa balay namo sa bukid nianang pagka Sabado pa ug igo lang mi nakahuman sa pagpahiluna sa among gipamalengke niadtong Sabadoha human sa paniudto.

     “ ‘Kol, maayong udto diha; mora man ug ‘relaxed’ na ka karon?”

     Tubag nako nga nahinganha, “Uy, nagmilagro man ka Doy nga mitunga ug Sabado nga kasagaran Domingo man ks mangape ug libre diri sa balay.”

     “Ah, laina pud nimo ‘Kol uy, Maulaw man ta ana. Mora man ug pangape lang akong tuyo nimo?”

     Dali nako’g gipauli-an ug kumedya nga pangutana si JB, “Kay ngano diay Jib, di ba kada anhi nimo moingon man ka nga mangape ka ug libre? Pakapin na lang na mga kulukabildo?”

     Ang karaho pud nako nga pag-umangkon gitubag pud ko ug pakurat nga dalang komedya, “Di na tinuod imong gisultu ‘Kol uy. Di ba usahay di man lang ko moanhi para mangape; di ba usahay mangutana ko nimo kon human na mo kaon? Kaon sad ako anhi sa inyoha ‘Kol, panagsa.”

     “Karaho gyud ka nga bataa ka. Nagpadungog ka na pud. Maayo gani naa pa’y sobra kan-on ug sud-an diha. Hala adto-a imo auntie ug pagkuha ug makaon nimo.”

     Kana ako gusto nimo ‘Kol ba kay maayo ka mobasa sa huna-huna sa imong mga pag-umangkon. Pero ‘Kol, magtimpla pud ko kape aron matulak ako kaonon.”

     Taudtaud mibalik si JB sa akong nahimutangan diin nagbasa ko sa usa ka nasudnong mantalaan basin makakita ug init nga isyu.

     “Kumpleto gyuud ni ako gikuha sa inyong lamesa sa kusina ‘Kol. Naa pa gyud buwad danggit. Gikan ni ila Sacha ‘Kol, sa Bantayan? Ako na pud gidaghan ang kan-on kay lami man ni nga buwad. Naa pa gyud kape.”

     “ ‘Kol, ingon sa akong Mama moadto ka daw Cebu ugma, mag-unsa ka didto Cebu ‘Kol, bisita sa imong mga ex nga gibilin?”

     Tubag nako, “ugok gyud ka Jib, mag ‘attend’ kon class reunion kay ako mangud class president. Gisigihan ko tawag sa ako mga classmates nga nag organisar sa maong kalihukan.”

     “Unsa man na ‘Kol uy, ‘class reunion’ lang mogasto pa gyud ka pamasahe sa aeroplano? Seguro sobra-sobra na imo kwarta.”

     “Buang nimo, unsay sobra-sobra?” Hapit man gani ko di moadtyo kay walay pamasahe sa eroplano, sobra-sobra na hinuon?”  Tubag ni JB, “sobra gyud ‘Kol kay moadto man gyud ka bisan ‘reunion’ lang.”

    “Ay Jib, igo lang pamasahe. Adto man ko puyo sa balay sa ako igsuon. Di na ko magbayad sa iyaha. Libre pa gyud tulog ug kaon, gamit pa ko sa iyang sakyanan.”

     “Sigi ‘Kol, di na ta lalis ana. Pero naa ko hangyo nimo ‘Kol. Karon man gud panahona mora ug kita nako nga kada lokal nga gobiyerno iyahay ug pangita pamaagi unsaon pagpatuman sa kampanya ni President Digong batok sa ilegal nga druga. Dala pasipsib ‘Kol ba aron mapansin sa Presidente.”

     “Ngano Jib naghuna-huna ka ana? Klaro man ang gusto sa Presidente nga mahitabo. Importante sa iyaha mawagtang ang mga mandurugas nga maoy nagdaot sa henerasyon sa kabataan karon.”

     “Mao gani ‘Kol nga ako paobserbahan nimo kon giunsa sa Cebu ang pagpatuman sa mando sa Presidente kay gusto niya dunay klaro nga resulta. Basin mga pulis sa Sugbo parehas pud dito sa Manila nga nag ‘tokhang for ransom’ ug nangilkkil sa mga negosyanteng mga Intsik ug Koreyano.”

     “Unya Jib naa ko ‘honorarium’ paghimo nako ‘research’ didto ug paghatag nako nimo ug report? Kapoy na imong gi-assign sa ako-a nga trabaho Jib ba.”

     “Ayaw lang ko pangayo-i ug bayad sa ako ‘request’ sa imoha ‘Kol. Interesado man gud ko kay balita nako daghan pud mga sindikato nga nagpalihok sa pamatigayon sa illegal nga druga didto. Maayo na naa tay makumparahan sa gihimo dinhi sa Davao aron ta kabalo unsa nga estratehiya nga dunay tsantsa nga molampos sa kampanya pagsanta sa druga.”

     “Sigi Jib, Pero naa ko pasi-una nga report nimo basi ni sa gisulti sa ako manghud sa among pag-estorya sa telepono niadtong milabay nga semana. Matud pa sa ako igsuon Jib dako ang papel sa mayor sa mga lungsod sama sa Cordova, ang pagseguro nga molihok gyud ang kapolisan aron masanta ang mga durugista. Usa ani Jib mao ang mando sa mayor nga matag gabi-i ang mobile Patrol sa kapolisan mosulod gyud sa mga barangay lakip na ang mga hilit nga dapit. Unya ang dugang niyang mando mao nga ang mobile team maglagda gyud sa log book sa barangay hall lakip na ang oras sa ilang pagpatrolya didto ingon man ang mga na-obserbahan ug nahimo nila sulod sa barangay. Ingon sa akong manghud JB, ang logbook isumiter sa kapitan sa barangay ngadto sa buhatan sa mayor diin ang sulod sa logbook ipa ‘photo copy.’ Kini mao ang basihan sa mayor paghimo ug rekomendasyon ngadto sa ‘provincial director’ sa kapolisan aron ma-evaluate ang ‘performance’ sa mga pulis lakip na ang ilang mga station commanders. Sa kabahin sa kapitan sa barangay kinahanglang magsumiter siya ug talaan sa mga tawo nga anaa sa pamatigayon ug naggamit sa druga ingon man kadtong ilang gituho-an nga posibleng mosulod sa maong kalihukan. Kini buot sa mayor nga ipa ‘validate’ sa police intelligence community aron matumbok gyud ang mamahimong target sa operasyon sa kapolisan.”

    “Mora ug maayo na nga pamaagi ‘kol ba. Maayo unta sundogon na sa kapolisan sa Dabaw. Total, kumpleto man ang mga pulis dinhi sa mga sakyanan ug ubang gamit sa pagpaniktik.”

     “Husto ka Doy. Dinhi makita ang ka-epektibo sa hini-usang kalihukan tali sa mga pulis ug sibilyan nga populasyon aron masulbad ang lawom na kaayong gamot sa sakit sa katilingban nga mao ang pagkuyanap sa makadaot nga druga.

     “Okay ‘Kol, mora pud ko ning-adto sa Cebu sa imong gipaambit sa ako-a. Mao na klaro nga ‘community engagement’ sa kampanya batok druga, ayos kaayo ;Kol. Sigi, uli na ko kay basin maabutan ko diri ug tingpa-init sa hapon; moulbo imo kaspa ‘Kol. Sigi ra ko palibre sa inyoha ug kape.

Posted in Opinion