NUNOT SA ALISNGAW SA KAPE| Naghinamhinam pero, sori na lang

SUBAY sa akong naandan alas 10 sa buntag kagahapon nagtempla ko ug kape aron kini hinayhinayan sa paghigop samtang magsusi ko sa akong e-mail address victorino.sumalinog@yahoo.com. Gusto nako masusi kon naa mga reaksiyon sa akong gipangsulat sa akong inadlaw nga lindog “Rough Cuts,” ingon man aron pagsuta kon naa ko mga mensahe gikan sa akong mga higala sa gawas sa Pilipinas lakip na ang akong pag-umangkon nga si John Brian kon JB.

Pero sa dihang ako na nga gi-“On” ang akong lap top kalit mikuliling ang ako mobile phone. Dali nako kining gipunit ug gitubag ang tawag. Nakurat ko kay ang akong nabati nga tingog sa pikas nga bahin mao man ang akong karaho nga pag-umangkon nga si JB.

“Maayong buntag nimo diha ‘Kol. He, he, he, kurat ka no? Seguro naghuna-huna ka nga sa e-mail lang ko kanunay momensahe sa imoha.”

Tubag nako, “Kurat mo lang Doy. Unsa man daghan ka seguro ug kwarta diha karon kay inay mag e-mail ka naggamit man ka ug celfone? Seguro nakadawat ka ug bonus o di ba hinuon naa nag tip sa imoha.”

“Wa ‘Kol uy. May diperensiya akong lap top mao nga ako gipaayos mentras sayo pa. Basin modako ang problema di na hinuon maayo. Lisod ra ba pagpalit ug brand new kay mahal kaayo diri. Kato akong lap top diha man to gipalit sa Davao ug akong gidala diri. Suko gani ako Misis kay wa na daw siya gamiton. Ningsugot na lang siya dalhon sa dihang akong gisultihan nga para di siya mingawon sa ako-a kada adlaw ko mag message sa iyaha.”

“Okay, Doy. Unsa man imo ibalita o ipangutana sa ako-a dali-on ni nato atong estorya kay ikaw ra ba nagtawag, natural nga ikaw ang ninggasto. Okay ra sa ako-a.”

“Grabe ‘Kol. Sikat kaayo ang Pinas ug si Presidente Digong diri sa Saudi karon. Ang mga balita sa telebisyon diri ‘Kol kanunay naghisgot sa gihimo nga ASEAN Summit diha sa Pilipinas. Natural nga ang gi-focus si Presidente Digong kay siya man ang Presidente sa ‘host’ nga nasud. Unya naa ko nakaestorya nga customer sa among restaurant nga usa ka Arabo ug amigo na nako kay permanente man siya diri mokaon. Ingon pa niya nga gusto daw niya ang estilo ni Digong; palaban ug hugot ug bakos, di basta mahuraw. Lipay pud ko ‘Kol bisan hibalo ko nga naa pud daghan wa ka gusto sa Presidente bisan diha sa atu-a sa Dabaw mismo.”

Tubag nako sa akong gwatsinanggong pag-umangkon nga medyo naseryuso na karon nga naa sa layo sa iyang pamilya, “Ana man gyud na Jibby. Si Digong nagpakita sa iyang katakos sa pagdumala sa nasud ingon man sa pagpahiluna sa mga kalihukan nga maglambigit sa ubang kanasuran. Mao nga sa akong tan-aw kon hatagan siya ug grado sa iyang pag ‘host’ sa maong panagtagbo sa mga lideres sa mga gamhanan nga mga nasud, pwede na siya nga naa sa 8 hangtud 9 kon ato basehan ang ‘range’ sa grado gikan sa 1 hangtud 10. Sa ako-a nga pagtan-aw Jib, kadtong diperensiya nga 2 o 1 ka punto naggikan kadto sa kapalpakan sa pipila ka mga tawo nga gisangunan sa paghimo ug programa alang sa mga bisita. Sa ako-a Jib, ang labing dako nga palpak mao ang sobra ka taas nga ‘entertainment portion’ sa wala pa ang ‘gala dinner’ alang sa mga delegado sa ASEAN Summit ug sa mga Pinoy nga gipang-imbitar sa maong okasyon. Gumikan sa katas naa ko nakita nga mga lideres sa mga nasud nga sakop sa ASEAN nga nakatulog ug nanghuy-ab. Ang ubang mga bisita mabasa na sa ilang mga ‘body language’ ang kapikal sa sobrang taas nga mga pasundayag.”

Kalit nga mipakgang si JB sa akong saysay ngadto sa iyaha. Matud sa akong gwatsinanggong pag-umangkon, “Sagdi na lang nang gusto nga magpasikat sa ilang talento ‘Kol. Ila man na katungod. Labi na to mga naghago nga magpratice sa ilang mga sakop alang sa pasundayag. Pero interesado ko ‘Kol sa kadtong nabalita nga gilagdaan nga kasabutan mahitungod sa pagpanalipod sa mga katungod lakip na ang paghatag sa mga benepisyo ngadto sa parehas namo nga mga OFW. Mora ug nakita na nako ang kadako sa ikatabang sa maong kasabutan nga nalagdaan sa panagtagbo sa mga lideres sa ASEAN.”

“Ha, ha, ha, he, he, he, he.” Mibahakhak ko ug katawa. “Sori sa imoha Dong JB. Mora ug sa akong tan-aw walay labot ang mga OFW diha sa Saudi ug uban pang mga nasud gawas sa ASEAN. Ang nagpirmahanay Doy mga lideres sa ASEAN lang ug dili lakip ang mga nasud nga walay labot sa maong kahugpongan. Mao nga ang ‘covered’ adto nga kasabutan mga OFW lang nga tu-a magtrabaho sa mga ‘ASEAN member countries.’ Mao na ang klaro Jib. Busa pasensiya nga ‘outside the kulambo’ ang sama nimo nga naa sa Middle East.”

“Sayanga uy. Kaingnon namo diri ‘Kol apil gyud tanan OFW. Wa diay namo maklaro ang kinatibuk-an sa balita nga among nadungog ug nakita sa telebisyon. Pero ‘Kol, posibli kaha nga matuki pud na sa atong gobiyerno ang posibilidad sa pagpahimutang sa husto ang kahimtang sa mga OFW sama namo nga di-a sa Saudi ug ubang Middle East nga mga nasud?”

Tubag nako kang JB, “Dako ang kahigayonan Doy kay akong nakita nga seryuso si Presidente nga tabangan ang tanan nga mga OFW sanglit dako kaayo ang kontribusyon ninyo sa ekonomiya sa Pilipinas. Kon pasagdan mo basin mangluod na hinuon ug di na mag remit ug kwarta diri sa atu-a kay ipadala na lang sa mga mopauli nga mga kaubang OFW. Naluko na.”

Naghulat pa unta ko ug tubag ni JB pero sunod nako nabati sa linya ang “toot, toot, toot.” Nahutdan na diay ug load ang tonto.

Posted in Opinion