Nunot sa Alisngaw sa Kape | Mora ug ligid ang kahimtang

Mora ug akong namatikdan nga “busy” ang akong pag-umangkon nga si JB didto sa iyang gitrabaho-an sa Saudi Arabia. Kini tungod kay nagkanihit na ang e-mail nga akong nadawat gikan sa iyaha niining nanglabay nga mga semana. Maayo na lang kay ning-abot na akong anak gikan sa iyang mga biyahe sa barko. Ang kakulangan sa mga mensahe ni JB nahulipan sa mga e-mail sa akong anak nga si Sacha. Ang nakahatag ug dugang kaikag nako sa pagpaabot sa iyang mga e-mail mao ang halos pagkaparehas sa ilang mga “subjects” sa mensahe – mga pakisayod ug pakighinabi mahitungod sa mga isyu nga nagpasulabi sa nasud Pilipinas karon lakip na ang sa Dakbayan sa Dabaw.
Kagahapon nagpadala siya ug mensahe samtang didto siya sa isla sa Bantayan mibisita sa lugar sa iyang asawa. Matud pa sa iyang e-mail sa ako-a:
“Pa, good pm nimo diha. Naa ko diri sa isla sa Bantayan aron mabisita ang lugar nila Maloy sa dili pa ko mobalik ug sakay sa barko karong maghinapos kining bulana. Pero di nako maiwasan nga maghuna-huna sa atu-a diha sa Dabaw kay halos kada adlaw dunay mga balita nga akong madungog o mabasa. Seguro tungod kay mora ug dili na man gud ma-ignore bisan sa mga nasudnong pamantalaan ug telebisyon ang atong dakbayan human mahimong Presidente si Duterte. Ang labing ulahi nga balita diha sa atu-a nga akong gikahikurat mao kadtong mga batan-on nga mga pulis nga nakuha sa CCTV nga naglatigo sa mga batan-on nga nadakpan human malambigit sa riot didto sa may Garcia Heights.
“Di ba makauulaw na nga hitabo diha Pa? Kon kanus-a taga Dabaw ang Presidente ug and hepe sa Philippine National Police nga hugot nga nagpatuman sa angay nga disiplina sa kapolisan diha pa mismo mahitabo sa dakbayan ang pagpanagmal sa mga pulis sa mga batan-ong mga suspek. Pastilan, mora ug dakong sagpa ang maong hitabo sa Presidente ug ni Bato dela Rosa. Unya mabaw pa gyud kaayo ang rason sa duha ka mga pulis. Kuno ilang gibunalan ug truncheon ang mga bitiis ug lapa-lapa sa mga dinakpan ug gilaparo sa likod sa ulo aron pagdisiplina sa mga barumbadong mga batan-on. Di ba hanep nga rason Pa? Ambot unsa kaha ang bati-on ni Presidente Digong ug ni Chief Bato?
“Pero Pa, ang maayo nga balita para sa ako-a nga nahitabo diha sa atu-a karon mao ang paghatag ug hinabang salapi nga mokabat sa P4.5 ka milyon sa mga dakbayan ug pipila ka mga lungsod sa Albay nga naapektohan sa pagbuto sa bolkang Mayon. Maayo kaayo na ilang gibuhat sa mga opisyales sa dakbayan kay grabe kaayo ang pagpanginahanglan karon ug tabang sa mga tawo nga nalukat sa ilang mga panimalay aron malikayan ang mibuhagay nga mga lava ug lahar gikan sa bolkan. Ti-aw mo ba sa kadaghan sa mga tawo nga nawad-an ug panginabuhi-an sulod na sa halos tulo ka semana nga nag-alburuto ang bolkang Mayon. Ug samtang kini nga kasakit nga gi-antos sa katawhan didto nagpabilin nga buhong ang Dabaw sa mga grasya gikan sa Gino-o. Nalipay ko nga naghuna-huna diri sa Bantayan kay isip taga Dabaw mora pud ko ug nakatampo sa gihatag sa atong dakbayan nga hinabang.”

Himuot ko nga naghuna-huna sa mensahe sa akong anak. Samtang naa siya sa barko kaniadtong milabay nga mga bulan wala siya’y laing hisgutan kon dili ang mga dapit nga gidunggo-an sa ilang barko; mga peligro nga nasugatan nila sa ilang paglawig nga usahay halos tagsa ka bulan nga naa sa dagat lamang. Ug ang kanunay niyang pangutana mao ang among kahimtang dinhi sa dakbayan. Mao nga ang akong tubag sa iyaha:
“Cha, husto na tanan imong nabasa ug nadungog mahitungod sa atu-a diri. Ako mismo wa magdahum nga dunay mga pulis sa Dabaw nga makaako sa pagsupak sa higpit nga pasidaan sa Presidente ug sa hepe sa kapolisan nga ampingan ang dungog sa PNP; nga dili dagmalan ang mga suspetsadong kriminal ug uban pang masinupakon sa balaod. Pero nahitabo na. Ug matud pa sa direktor sa kapolisan sa dakbayan nga si Sr. P/Supt Alexander Tagum iya na nga gipaimbestigahan ang maong insidente. Ug dili niya palabyon ang maong salaud sa duha ka mga pulis kon mamatud-an.
“Ang ikaduha nga imong gihisgutan, ako na nga gidayeg sa akong lindog. Lipay pud ko kay nakahuna-huna ang mga lideres sa Dabaw nga maghatag ug hinabang. Angay lang gyud kay ngil-ad huna-hunaon nga samtang naglunang sa kahayahay ang atong dakbayan adunay pipila ka mga lokal nga kagamhanan nga nag-ilaid sa kalisod ug kasakit. Alang sa ako-a Cha di gyud matag-an ang panahon. Mora baya ug ligid ang kahimtang sa usa ka lugar sama sa kinabuhi sa tawo. Di tanan higayon ang Dabaw naa sa taas. Posibli pud nga mabutang kini sa ilawom. Pag-abot ana seguro di pud kalimot ang mga lugar nga gitabangan sa kagamhanan sa dakbayan. Uli ka diri sa di pa ka balik ug sakay?” SEND

Tagged with: ,
Posted in Opinion