NUNOT SA ALISNGAW SA KAPE| Mga OFW nagbantay sa pagpangandam sa ASEAN

NIINING mga adlawa ang Pilipinas na-a sa sentro sa panan-aw sa mga tawo sa tibuok kalibutan.

Kini tungod kay karong mosunod nga mga adlaw ang nasud mao ang “host” sa ika 31 nga ASEAN Summit. Ang ASEAN mao ang Association of Southeast Asian Nations. Dinhi gipaabot ang pag-anhi sa Pilipinas sa mga lideres kon Presidente sa mga membro nga nasud ingon man ang mga “partners” niini sama sa Estados Unidos, Japan, South Korea, Russia, China, India, New Zealand, Australia, East Timor, ug sa Presidente sa European Council ug sa United Nations.

Gawas sa mga Presidente gipaabot nga moanhi usab sa nasud ang mga Kalihim ug ministro sa nagkadaiyang mga Departamento sa ilang mga gobiyerno. Sila makigtagbo sa ilang mga “counterparts.”

Kini ang hinungdan ngano nga grabe ang pagpangandam sa Pilipinas aron pagseguro nga walay mahitabo nga dautan sa mga bisita samtang ni-a sila sa nasud. Gani, gilakip usab sa gobiyerno sa pagseguro nga limpiyo ang palibot sa mga dapit diin posibli nga moadto o dili ba maagi-an sa mga Presidente ug ubang mga delegado.

Seguro kini ang hinungdan nga bisan ang akong pag-umangkon nga si JB didto sa Riyadh, Saudi Arabia mora ug nakabantay sa ka “busy” sa mga kadagko-an sa nasudnong kagamhanan. Kini akong nasayran gikan sa iyang e-mail nga gipadala sa ako-a nga akong nabasa kanidtong milabay nga Hwebes. Matud pa sa akong pag-umangkon.

“Maayong adlaw nimo diha sa Dabaw ‘Kol. Musta man mo diha, okay ba ako mga ‘cousins;’ si Auntie? Kuyaw kaayong Pinas karon ‘Kol no. Halos matag gawas sa balita sa mga telebisyon internasyonal diri sa Saudi naa gyud ‘segment’ diin mahisgutan ang pagpangandam sa Pilipinas alang sa ASEAN Summit. Ang nakatawag sa atensiyon sa mga tawo diri sa Riyadh, ma Pilipino, Ma Arabo man o bisan unsang rasa mao ang giingon nga kahigpit sa ipatuman nga seguridad diha sa Metro Manila ug sa Clark. Seguro mas grabe pa ang pagpangandam karon kay sa gihimo kaniadtong pagbisita sa Santo Papa.

“Kabalo ka ‘Kol, kaniadtong milabay nga adlaw naa mi customer nga Europeano nga ako mismo ang nag-atiman. Iya ko gipangutana kon Pinoy ko. Siyempre ‘proud’ ko nga mitug-an sa iyaha nga Pinoy ko ug nga lipay ko nga higpit ang pagpangandam sa Pinas alang sa usa ka dakong kalihukan sa atong nasud.

Ang iyang sulti sa ako-a nga kuno ang pangulo sa European Council diin ang iyang nasud miyembro, gikabalita nga motambong usab sa ASEAN Summit ug nga sa iyang tan-aw mora ug nakaseguro siya nga luwas ang ilang opisyal sa iyang pagbiyahe sa ato-a. Nangutana pud siya sa ako-a ‘Kol kon di ba kaha posibli nga ang mga terorista nga naglihok sa Mindanao makaabot didto sa Manila unya maghimo ug kagubot didto. Ang akong tubag sa iyaha ‘Kol nga mora ug halos hurot na ang mga terorista nga nakiggubat sa mga pwersa sa kagamhanan didto sa Marawi. Pero ako pud siya gipasabot nga ang atong mga militar ug kapolisan wa magpakampante aron sa pagseguro nga di ta kalutsan sa mga terorista ug sa mga sumusunod nila nga basin nagpakahilum lang ug anaa na diay sa kaulohang Manila. Pero ‘Kol, unsa man gyud ang tinuod nga kahimtang diha sa ato-a; wa na ba gyud binakbakay diha sa Marawi?

Human nako ug basa sa e-mail sa akong karahong pag-umangkon diha nako naaninaw kon unsa pud ang mga kabalaka sa mga Pinoy nga tu-a sa laing nasud sa matag higayon nga sila makabalita ug dili maayo dinhi sa Pilipinas. Seguro maghuna-huna pud sila kon posibli ba nga kon dunay kaguliyang makaapekto kini sa ilang mga mahal sa kinabuhi.

Dali nakong gitubag si JB.

“Doy, husto na imong nakita ug nabati nga mga brodkast diha telebisyon mahitungod sa kalihukan karon sa atong gobiyerno. Grabe ang pagpangandam sa atong mga opisyales sa militar ug sa kapolisan alang sa umaabot nga ASEAN Summit nga diri himoon sa Clark ug sa Kaulohang Manila. Kinahanglan ‘paranoid’ ang huna-huna sa atong gobiyerno; kana bang sa imong panan-aw dunay gyud dautan mahitabo inay maghuna-huna nga wala. Tiaw mo ba nga ang Presidente sa Amerika, Premier sa Russia ug India, Presidente sa Canada ug Australia ug sa New Zealand, hepe sa European Council, ug ang Presidente sa United Nations, ingon man sa mga lideres sa mga membrong nasud sa ASEAN magtapok sa Pilipinas arong hisgutan ang mga mahinungdanong mga butang may kalabutan sa ekonomiya, kaseguro-an, panagkumboya! Bug-at kaayo nga responsibilidad kining tanan alang sa Pilipinas nga mao ang ‘host’ nga nasud. Dako kaayong kaulawan sa gobiyerno ug ni President Digong kon dunay mopalpak sa pagpangandam aron maseguro ang kaluwasan sa mga gihisgutang delegados. Unya Doy gusto pud ipakita sa Pilipinas nga kita diri dili lang basta pipitsugin nga nasud. Mao nga higpit kaayo ang mga lakang nga gisagop karon sa gobiyerno aron wala gyud bisan gamay nga bulilyaso labi na sa seguridad ug kaluwasan sa mga bisitang dagkong tawo sa kalibutan.

“Mahitungod sa imong pangutana Jib kon duna pa ba gihapon binakbakay sa Marawi, seguro nabalitaan nimo kadtong labing ulahi nga hut-ong sa mga napatay nga siyam ka mga ‘stragglers’ nga mga terorista lakip na ang ig-agaw sa mga Maute ug ang umagad ni Isnilon Hapilon. Kadto nga insidente Jib, kabahin sa gihimo nga ‘clearing operation’ sa mga sundalo sa sentro sa giyera diin gikataho nga duna pa nahibilin nga nagtago-tago nga mga teroristya. Ingon ana man gyud na Jib. Sa bisan asa nga kagubot labi na kon giyera naa man gyud posibli nga mahibilin . Mao nga dili basta gitugutan ang mga mibakwet nga mga residente nga mobalik sa Marawi labi na didto sa sentro. Posibli man gud nga mahimo pa silang laing hut-ong sa mga bihag kon duna pay nahibilin nga mga armado. Pero ayaw kabalaka Doy. Medyo nakaseguro ko nga magmalampuson ang gobiyerno sa gipatuman nga mga mehoras aron pagseguro sa mga bisita. Human ana, dako nato nga dungog nga kita ang hisgutan sa mga lideres sa ubang nasud ug posibleng himuong ehemplo ang atong sistema sa pagpangandam sa seguridad sa mga bisita. Gawas pa, daghan nga positibong mga kalambo-an nga modangat sa Pilipinas pinaagi sa mga kasabutan nga lagdaan ug makab-ot atol sa ika 31 nga ASEAN Summit.”

“Hulata lang Jib ang mga mosunod nga maayong balita.” SEND.

Posted in Opinion