NUNOT SA ALISNGAW SA KAPE| Lugi ang PCSO sa STL kay…

     Kaniadtong Huwebes sa gabii nag ‘chat’ akong anak ug ang iyang ig-agaw nga si JB nga tua karon sa Saudi nagtrabaho.

     Sanglit naa man ko sa balay niadtong orasa ninghangyo ang akong gwatsinaggo’ng pag-umangkon nga iya ko estoryahon inay mag e-mail pa siya sa ako-a. Mao nga nasingit ko sa ilang chat sa akong anak.

     Ang karaho nga si JB gisugdan ko dayon ug bugalbugal nga estorya. Matud pa sa akong pag-umangkon, “Musta man ka diha ‘Kol. Mora man gyud ka ug wa matiguwang bisan tulo ka tuig na ka human moretiro? Di ba ‘Kol pag retire nimo 65 anyos na ka? So, karong naa na ka sa 68 anyos ang pangidaron.”

     Ako dayong siyang gitubag, “Unya Jib, ngano diay nga ingon ka wa ko matigulang, unsa man diay imong tan-aw sa ako-a?”

     “Si ‘uncle’ pud, ayaw lang gud ka –itok ‘Kol. Sa tulo ka tuig human sa imong pagretiro sa edad 65 di naa na ka karon sa 68 anyos, di ba?”

    Sumpay nako, “Kaayo Jib; unya ngano ingon ka wa ko matiguwang? Pila man diay akong edad subay sa imong tan-aw?”

     Dalang hagikhik nga tubag sa akong buriton nga pag-umangkon, “Mora pa man gud ka ug 67 anyos lang ‘Kol. Bata pa, di ba?”

     “Tarantado, naisahan ko nimo. Kaingnon nako seryuso ka. Binu-ang lang man diay gihapon.” “Ayaw lang gud ka itok ‘Kol Vic. Pawala lang man gud ni ako-a sa laay diri nga maghuna-huna diha sa atu-a.”

     “Okay, sakitan man gud ko sa imong komedya Doy. Mora man gud ug tinud-anay na to imo binu-ang.”

     “Ayaw lang gud ka sensitibo kaayo ‘Kol. Basin hinuon matigulang ka ug dali.” Sa akong huna-huna, “Tonto gyud ning si JB. Pero sige lang basin naa ko’y pasalubong pag-uli niya; bisan dalunggan sa camel na lang aron himuon nako ug sandwich.”

     “Unsa na man nahitabo diha sa Dabaw ‘Kol? Naa ko nabalitaan sa telebisyon nga kuno nagreklamo ang Philippine Charity Sweepstakes Office nga inay modako ang ilang kita sa pagkuyanap sa mga booking stations sa Small Town Lottery kon STL, ningsamot na man kuno ka LKK ang ahensiya. Sa tibuok Mindanao ‘Kol halos anaa na kuno sa 300 milyones ka pesos ang kita nga adto unta sa STL pero naadto na hinuon sa illegal nga sugal. Ang grabe pa gyud nga balita mao ang kuno paghimo sa mga STL booking stations nga ‘remittance center’ sa taya sa illegal nga sugal sama sa ‘Last 2’ nga grabe’ng mikuyanap diha sa Mindanao. Unsa diay nahitabo sa giingon ni Presidente Digong ‘Kol nga pakusgan niya sa kapolisan ang kampanya batok sa illegal nga sugal?”

      Tubag nako, “Unsa pa Doy, mora ug naanod sa tubig nga botelyang ‘plastic’ nga sarado. Molutaw, molubog sa tubig. Ang mga pulis ‘Now you see, now you don’t.’ Pero Jib tinuod na imong nabalitaan nga mas dako pa ang kita sa mga nagpadagan sa STL bookies gikan sa illegal nga sugal kay sa ilang halin sa ticket sa STL. Unsaon, kusog kaayo ang hunghong diri sa atu-a Jib nga ang mga ‘franchise holders’ sa STL mao man pud kasagaran nagpadagan sa ‘Last 2’ ug loteng. Gani naa ko nailhan nga amigo pud nimo nga tigpataya ug ‘Last 2’ nga nakita gyud nako didto nag ‘remit’ sa iyang koleksiyon sulod sa ‘booking booth’ sa STL nga duol pa gyud kaayo sa eskuylahan. Unya ang pulis wa pa gyud kakita sa tayaanan sa ‘Last 2” tupad lang sa terminal sa Calinan. Ang pagpanawat ug taya didto gikan buntag hangtud sa gabi-i. Di na katuho-an kon ang pulis moingon nga wa sila’y nakita nga nagpa ‘Last 2’ didtong dapita.”

     Mora ug natuk-an si JB sa akong gisulti. “Unsa ‘Kol, wa pa diay to mounding pagpataya didto sa may terminal? Motaya ra ba ko didto usahay kon adto ko mosakay sa ‘shuttle service’ nga nagterminal didto.”

     “Aha! Parokyano diay ka adtong patayaan sa ‘Last 2’ Doy ha. Basin magtukod ka ug “Last 2” diha sa Saudi. Na, mabitay gyud ka Jib.”

     “Pero ‘Kol Vic, mora man ug walay kisaw ang simbahan nato diha mahitungod sa sugal? Ngano, tungod kay legal ang STL? Hinumdom ko ‘Kol nga imo ko gisultihan sa imong krusada kanhi sa panahon ni Monsignor Mabutas sa dihang gitugotan pud ang Small Town Lottery sa Davao; kadtong giingon nimo ‘Kol nga gi-operate sa Velarde and Sons, Inc. ba. Di ba grabe ang pagtutol sa simbahan ato? Di ba bokal kaayo si Archbishop Mabutas atong panahona batok sa maong sugal?”

     “Jibby, di na ko katubag nimo ana imong mga pangutana. Basin pag-uli nimo matubag na na. Pero bitaw no, ngano kaha hilom man ang simbahan karon; wa na seguro suroy-suroy kapari-an ron. Wa sila kakita sa halos nagdasok na nga mga ‘booking booths’.” Pastilan!

Posted in Opinion