Nunot sa alisngaw sa kape | Kalma lang diha Saudi Doy

NIINING semanaha ubay-ubay pud ang mga e-mails nga akong nadawat. Duna’y gikan sa mga higala nga nakabasa sa pipila ka mga isyu nga akong gituki sa lindog nga Rough Cuts. Uban nagdayeg, duna pud uban wa mahimuot sa akong posisyon sa mga isyu nga akong gituki.

Pero naay panultihon nga kon dunay reaksiyon sa gisulat, pagdayeg man o pagsaway, o pag-alkontra, mas maayo kon ikompara sa wala la’y bisan unsang reaksiyon. Buot ipasabot dunay nagbasa sa usa ka kolumnista. Kon wala’y bisan usa ka reaksiyon, ang kahigayonan walay nagbasa sa lindog.

Hinuon, mas dako ang akong kahimuot kon dunay mga e-mail gikan sa akong mga paryente nga tu-a sa gawas sa Pilipinas. Mao nga sa dihang akong nakita nga dunay mubo nga mensahe ang akong gwatsinanggong pag-umangkon nga si JB nga tu-a nagtrabaho sa Saudi dali nako gibasa kini.

Matud pa niya sa iyang e-mail:

“Uncle Vic, kuyawan ko diri sa Saudi karon ‘Kol. Unsaon, mora ug maapektuhan pud mi diri sa kasuko ni President Digong sa mga nahitabo nga pagpangabuso sa mga Pilipino’ng OFW sa Kuwait. Mora ba ug madamay mi nga di-a sa Saudi. Unsaon, naa man pud gipangmaltrato nga mga OFW diri. Dili daghan pero mga babaye nga katabang sa panimalay sa mga Saudis. Unya ‘Kol Vic mora ba ug gilangkob na lang sa Presidente ang pagpapauli sa mga OFW. Bisan kadtong mga propesyonal ug ‘skilled workers’ gusto na sa Presidente nga papauli-on na lang. Unsaon na lang ani kon madamay mi diri sa Saudi. Wa pa ra ba gyud ko natigom ‘Kol. Unya gamay pa akong anak. Di na ko kapa-eskwela ani. Unya ‘Kol siyempre duol na mi ni Misis matag adlaw. Madugangan na pud ako’ng anak ani ‘Kol. Labi na gyud ‘Kol Vic kay tu-o man ko Presidente Digong nga angay hinayhinay lang ang pagpagawas ug mga bata sa Pinas kay sobra na ta kadaghan dinhi; 110 million na ka Pinoy nagdasok sa gagmay nga espasyo nga nahibilin sa Pilipinas. Unya ako Misis ‘Kol Vic di na siya pwede ‘injectibles’ nga kontraseptibo. Diha gani mi pirmi lalis sa diha pa ko Pinas ‘Kol. Unya parehas pud mi Presidente ‘Kol di ko gusto ato iyang di nagustohan Family Planning method kay wa daw ‘feeling.’ Unsa imo ikatambag sa ako-a ani nga posibleng problema ‘Kol Vic.

Nahimuot kaayo ko nga nagbasa sa e-mail sa akong pag-umangkon nga si JB. Lain diay iya gikagul-an. Dili ang posibilidad nga mauli siya sa Pilipinas kon dili ang kahigayonan nga madugangan ang iyang anak.  Hinuon, kasabot ko sa problema ni JB. Kay kon modaghan iyang anak unya iyang sweldo dinhi sa Pinas layo ra sa gidak-on sa iyang sweldo didto sa Saudi, natural maglisud siya pagbuhi sa iyang pamilya bisan pa duha sila trabaho sa iyang Misis. Busa dali pud nako gitubag ang si-aw nga si John Brian.

“Naunsa man ka Doy, kuratan na man ka kaayo. Basin gihubaghubagan na ka diha sa pagpaminaw nimo sa mga balita diri sa Pilipinas. Ayaw kabalaka JB kay mora ug walay labot ang Saudi sa giplano sa Presidente nga dili na magpadala ug mga Pinoy nga trabahante didto sa Middle East. Kon kini mahitabo gyud seguro ko Doy nga ang Kuwait mao lang ang di na padalhan. Gawas lang Jib kon duna na pud daghan mga OFW diha Saudi nga madiskobre nga gi-abuso sa ilang mga amo ug mga kompaniya nga gitrabaho-an. Kalma ka lang diha Doy mentras di pa hingpit desisyon ni Presidente Digong. Tuo pud ko Jib nga ang tumong sa Presidente sa pagpagawas sa iyang warning ngadto sa mga kanasuran sa Middle East mao ang pagpasidaan sa mga lideres didto nga ang Pinas di magpakabuta-bungol sa pagdaogdaog sa mga Pinoy ug Pinas diha sa maong mga dapit.

Matud pa sa Presidente Jib nga unsa man kaha ang bati-on sa mga lideres sa mga nasud diha kon ang gihimo sa mga taga Middle East ngadto sa mga Pinoy buhaton pud sa mga Pinoy ngadto sa ilang mga tawo nga di-a karon dinhi sa Pinas? Seguro suko pud kaayo sila sa atu-a. Mao nga mora lang ug gibalanse sa Presidente ang sitwasyon. Klaro man gud kaayo Dong Jibby nga mas gikinahanglan sa mga nasud diha ang mga serbisyo gikan sa mga Pinoy kay sa kita ang nagkinahanglan sa ilahang serbisyo. Kon walay mga OFW nga mga Pilipino labi na gyud kadtong mga professional ug skilled workers lakip na pud mga katabang sa panimalay, lukapa man gyud na mga nasud diha. Maayo gud manarbaho ang mga Pilipino Doy, di ba? Kay kon dili pa dugay na ta nila nga gibalibaran nga makasulod sa ilang mga nasud. Mentras tanto, paningkamot sa diha aron di pakyas imo paningkamot sa gawas sa atong nasud. Ayaw lang pagsini-aw diha kay basin kasala ka. Na, maputlang ka gyud… ug li-og. SEND.

Posted in Opinion