NUNOT SA ALISNGAW SA KAPE | Kalambo-an sa Dabaw nabantog na

MEDYO  na-missed nako ang mga e-mail sa akong si-aw nga pag-umangkon nga si JB kinsa tu-a sa Saudi Arabia nagtrabaho. Balita nako gikan sa iyang Misis nabalhin ang oras sa iyang “assignment” hinungdan nga kinahanglan kuno niya nga mag-adjust sa iyang oras sa pagkatulog.

     Sa akong huna-huna mao seguro kini and hinungdan sa halos usa ka e-mail na lang iyang ipadala sa ako-a ug nga sa karon nga semana wa gyud ko’y nadawat.

     Pero salamat kay gawas sa mga reaksiyon nga akong nadawat may kalabutan sa mga isyu nga gituki nako sa akong lindog, ning-abot na pud ako’ng anak gikan sa iyang biyahe human manaog sa “ocean-going vessel” nga iyang gisakyan. Samtang tu-a pa siya sa Cebu diin didto na magpuyo ang iyang batan-ong pamilya, punay pud ang iyang e-mail sa ako-a ug sa iyang mama ug mga igsuon sa Dabaw. Sama sa akong pag-umangkon nga si JB kasagaran sa iyang e-mail mga pangumusta, mga pangutana sa mga panghitabo dinhi sa Dabaw ug reaksiyon niya sa mga nasudnong mga panghitabo.

     Kagahapon sa iyang e-mail sa ako-a mao kini ang iyang gituki:

     “Good day Pa! Musta man dha sa ato? Musta na imong mga isda nga Koi? Balita nako nangamatay daw ang daghan? Balita nako diri sa Cebu grabe daw kusog ang asenso sa atu-a city. Seguro tinuod ni kay daghan sa akong mga nabasa nga balita hisgot man sa naglinya nga mga dagkong negosyo nga buot mosulod sa Davao.

     “Di na ko mahibulong kay siyempre taga Dabaw man Presidente Digong. Daghan man gusto mosipsip ug daghan pud mosakay sa positibong dagan sa panahon. Gawas pud ana Pa, daghan sab mga bag-ong proyektong infrastraktura nga gipahiluna karon sa Mindanao nga kasagaran naglakip sa Dakbayan sa Dabaw. Sa akong tan-aw Pa ang labing dako nga proyekto mao ang gilaraw nga Mindanao Railway System diin buot ikonekta ani ang mga dakbayan da Dabaw, Tagum, Butuan ug Cagayan paingon sa amihanan nga bahin sa Mindanao, ug gikan Dabaw ngadto sa Digos sa Davao del Sur ug hangtud General Santos City. Sa akong tan-aw Pa kon madayon ug mahuman kini dako kaayo ang i-asenso sa pagpadala sa mga produkto ngadto sa paingnan niini pinaagi sa train. Posibli pud dako kaayo ang diperensiya sa pamasahe. Sa laktud nga pagkasulti Pa, mas mosayon ang mga pagbiyahe sa katawhan sa Mindanao.

Pero unsa man ang klaro nga estado ana nga proyekto sa gobiyerno Pa? Human man gud sa mainiton kaayo nga pagtuki sa maong Mindanao Railway project, nahilum na man. Mora man ug nabugnaw; basin maparehas ni ug aso nga kalit lang mohungaw ug mahanaw sa kahanginan.

     “Balita pud nako Pa, gipalapdan daw gikan sa 2-lane ngadto sa 4-lane ang dalan diha sa Catalunan Grande sugod sa crossing Diversion Road sa Bangkal. Unya, human na seguro o di ba hapit na gyud makumpleto kay Enero 2018 man kuno ang ‘contract completion date’ sa maong proyekto. Semento pa gyud ug dili basta lang aspalto. Wow, hayahay na kaayo ang biyahe ana. Kita na gyud na nako nga asenso sa ato-ang barangay diha Pa.

     “Unya Pa, gisugdan na diay pud ang Coastal Highway gikan Sta. Ana hangtud sa Toril. Naa na ko nakita sa FaceBook mga retrato nga magmatuod nga duna na gyud kabahin sa maong highway nga gitrabaho na sa kontratista sa Department of Public Works and Highways (DPWH).  Seguro kon mahuman ni Pa, dako ang ilu-ag sa mga nag-unang kadalanan sa dakbayan sama sa MacArthur Highway ug sa karon C.P. Garcia Diversion Road.

     “Naa pa gyud Davao-Samal Island Garden City Bridge nga dugay na kaayong gihisgutan ug karon naa pa gihapon sa estado sa pagtuon kon ‘feasibility study.’ Basin maparehas ni sa gapnud pa nga mahanaw sa kalit kon maanod sa sulog sa dagat atol sa pagtaub .”

     Mora ug nakalitan ko sa kahingpit sa nahibaw-an sa akong anak nga si Sacha sa mga giplano ug gisugdan sa pag-implementar nga mga proyekto sa Dakbayan. Mao nga ang akong tubag sa iyang e-mail ingon lang ani:

     “Cha, asa nimo nahibaw-an ang maong mga balita dinhi? Seguro sigi ka basa sa website sa Mindanao Times kay kumpleto man imo inpormasyon? Tinuod na imo tanan hibaw-an. Ang Mindanao Railway System medyo ninghanap ang sitwasyon bisan pa sa kagalante sa mga naunang pamahayag mahtiungod sa maong proyekto. Pero pasalig ni ni Presidente Digong. Duna pay upat ka tuig natong hulaton nga madayon gyud ni.

     “Unya Cha, ang Catalunan Road expansion wa gyud matuman ang pasalig nga makumpleto niining bulan sa Enero. Layo pa kaayo. Seguro naa pa sa 40 porsento. Ang nakita nako nga problema Cha mao ang pagkuha sa ‘right of way’ sa maagi-an nga mga residential subdivisions ug sa komersiyal nga bahin sa maong dalan. Gani mubo pa kaayo ang bahin sa dalan diin naguba na ang kabalayan nga apektado sa proyekto. Seguro wa pa gyud magkasinabot sa presyo sa yuta ug sa balay nga maguba. Sa akong tan-aw Cha, posibleng magkinahanglan pa ug laing tunga ngadto sa usa ka tuig. Unsaon pag ‘justify’ ana sa kontratista ug sa DPWH mao ang angayan nga bantayan sa publiko.

     “Ang ‘coastal highway’ tinuod nga gisugdan na ug kini mahimong mauna sa pagkahuman sa proyekto sa Mindanao Railway ug sa taytayan sa Dabaw ug Samal. Husto ka Cha, dako ang ilu-ag sa kadalanan sa dakbayan kon mahuman na ang ‘coastal highway.’ Ti-aw mo ba nga daghan sa mga pribadong sakyanan nga ang destinasyon diretso sa sentro sa dakbayan o ngadto ba sa distrito sa Agdao seguro man gyud nga adto na moagi sa ‘coastal road.’ Mao nga manghinaot lang gyud ta nga matuman ang gitakda nga panahon sa pagkumpleto sa proyekto ni DPWH Secretary Mark Villar. Hinuon Cha, ang Davao-Samal bridge project medyo hanap pa kaayo. Di lang sa kaayo ni nato lauman. Pero kon nakakomiter ang Presidente nga iya ning ipatuman sulod sa iyang administrasyon, mahimugso ra gyud na. Sayang Cha, kay naa na man ka balay diha sa Cebu ug alanganin na pud nga diri ka magpahiluna sa imong pamilya sa Dabaw. Seguro mas maagni ka nga kanunay nga mobakasyon dinhi matag kanaog nimo sa barko. SEND

Posted in Opinion