NUNOT SA ALISNGAW SA KAPE| Kabalaka ang nagpasulabe                      

SA PAGLAKAW sa ako’ng pag-umangkon nga si JB ngadto sa Saudi ako nga gihuna-huna nga wa na’y magtugaw sa akong Domingo kay wa na ma’y mobutho lang ug abot samtang naa ko gitrabaho sa balay.

     Pero nabantayan pud nako nga sulod sa halos duha ka semana nga wala si JB mora pud ug haw-ang ang Domingo nga wa ko’y ikahinabi nga magkulit-kulit sa ako-a sa mga butang nga may kalabutan sa dagan sa atong gobiyerno karon.

     Mao nga di nako malikayan nga gipangita pud nako ang iyang pagbisita sa balay. Hinuon, wa sab nako damha nga bisan wa siya personal, kining mga moderno nga pamaagi sa komunikasyon sama sa Facebook ug E-mail mora lang gihapon ug naa siya sa duol. Sa milabay nga semana nagkahinabi mi mahitungod sa nahitabo sa Marawi pinaagi sa Facebook.

     Kaniadtong milabay nga Huwebes nag-email pud si JB sa ako-a nagsaysay sa mga kabalaka sa pipila ka mga Pinoy nga iyang gikaila didto kasagaran kanila taga Mindanao pud ug naay mga pamilya nga nahibilin dinhi.

     Matud pa sa akong pag-umangkon sa iyang e-mail, “ ‘Kol, kumusta na man ka diha? Wa ka giadto-an sa inyong balay kay naa ra ba imo column nga usahay pabalang nga komentaryo bahin sa Martial Law. Usahay man gud ‘Kol mora pud ka ug isog ba nga mangatake pero bahag man imong ikog. Mabantayan nako nga pag-abot sa tumoy nga bahin imonh column positibo ang imong mga pagtratar sa mga aksiyon sa gobiyerno.”

     Sa akong huna-huna samtang nagbasa sa iyang e-mail, “Buang ning bataa ni. Gitirahan man hinuon ko nga kakak. Wa siya kabalo nga naneguro lang ko nga dili maselo ang mga hingtungdan ug nga balanse ang pagkomentaryo nako sa mga isyu nga mipatigbabaw karong mga panahona.”

     Dugang sa karaho nakong pag-umangkon sa iyang e-mail, “Bitaw ‘Kol, ayaw lang kasuko. Kon masuko ka sa ako-a wa man kay mahimo kay di-a man ko sa Saudi. Di ko nimo makasab-an sa atubangan.  Pwede sa imong tubag sa ako e-mail. Pero kon sa tan-aw nako medyo suko na ka  i-delete nako imong e-mail tapos ako’ng problema. Joke lang ‘Kol ha. Mingaw ra man gud ko sa imo ug sa ato diha. Maayo na lang kay diri sa ako gitrabaho-an lima mi ka mga Pinoy ug libre pa gyud among puy-anan. Ang akong mga kauban mga taga Mindanao. Naay taga Surigao, taga Misamis Oriental ug taga Davao del Norte ug Comval.  Mao nga human sa trabaho naa ko kadungan ug kape aron pagpawagtang sa kalaay ug kamingaw.”

     Huna-huna nako, “Maayo gyud ni mangatik ning akong pag-umangkon. Gimingaw kuno siya sa ako-a; di na lang moklaro pag-ingon nga gimingaw siya sa iyang asawa ug anak. Pero okay ra. ‘At least’ naghuna-huna siya sa ako-a ug sa mga butang iyang masayran pinaagi sa pag-email sa ako-a matag karon ug unya.”

     Mipadayon si JB sa iyang e-mail, “Balo ka ‘Kol, ang gitutokan sa mga Pinoy diri mahitungod sa Martial Law diha sa Mindanao dili ang mga maayong butang nga mahimong mosangpot human sa giyera diha sa Marawi ug sa pagkapapha sa mga teroristang grupo sa mga Maute. Ang ilang gitutokan pag-ayo mao ang pagkagusbat sa Marawi gumikan sa grabeng engkwentro ug pagpamomba sa militar. Ila pud gihuna-huna ‘Kol nga nagmata lang ug buntag ang gobiyerno kay layo ra sa tinuod ang ilang gisulti nga pwersa sa mga terorista sa sinugdanan sa gubot. Ingon akong mga kauban diri nga kon gamay lang ang grupo sa Maute ngano nga hangtud karon wa pa mahurot ang mga bandido human ang tulo ka semana. Unya ‘Kol naglibog pud ako’ng mga kauban giunsa sa paglusot sa mga dagko ug sopistikadong mga armas ug bala ug gamit sa komunikasyon ngadto sa mga kamot sa mga terorista didto sa Marawi kon hingpit ang gwardiya sa mga sundalo ug kapolisan sa mga nahibaw-an nga agi-anan paingon didto? Mao nga hasta pud ko ‘Kol nakapangutana na lang pud ngano kaha. Ikaw ‘Kol naa ka’y panaghap?”

     Gumikan sa maong pangutana ni JB ako siya gisultihan sa akong balos sa iyang e-mail nga, “Bisan gani si Ssenador Lacson Jib nanguta pud ngano nga bisan pa sa kuno nadawat sa militar nga mga intelligence Report nga kubkubon sa mga terorista ang Marawi aron magtukod ug sinugdanan sa lugar alang kuno sa ISIS dinhi sa Pilipinas wa kini mapangita-i ug paagi sa kasundalohan nga masanta  aron dili mosangpot sa ingon na niaron kadako nga kagubot.”

     Pagseguro nako kang JB, “Ayaw lang kabalaka Doy, luwas pa gihapon imong Misis nga mobiyahe matag adlaw paingoin ngadto sa iyang oposina ug pauli kay mora lang man ug walay Martial Law diri sa Davao. Sigi lang diha, basta ayaw lang pa-recruit nga mahimo kang ‘jihadist’ sa imong pagbalik diri. Importante nga magpabilin ka nga ‘under de saya’ ug dili ilawom sa saya. Sigi Jib, i-update ti ka unsa ang mga mosunod nga panghitabo diri.”

                                                                                  -30-

Posted in Opinion