NUNOT SA ALISNGAW SA KAPE | Isyu ni Digong sa Gino-o gihisgutan pud sa Saudi

Lu-ag ang akong oras kagahapon sa buntag. Gumikan ani sayo ko nga nag-abli sa akong computer aron susihon kon naa ko mga e-mail nga ning-abot. Wa ko masayop; dunay upat ka mga mensahe sa akong e-mail box. Usa ani gikan sa akong gwatsinanggo’ng pag-umangkon nga si John Brian kon JB nga nagtrabaho sa Jeddah, Saudi Arabia.

Pero una nako gipangbasa ang mga mensahe nagtimpla una ko ug kape kay mao man gud na nga “beverage” nga makapiskay sa akong utok labi na kon magsulat ako sa akong lindog sama niini karon.

Ug samtang akong gihanggap ang alisngaw sa natibong kape nga regalo sa ako-a akong namatikdan ang kalainan sa maong matang sa kape kon ikompara sa uban. Sunod-sunod nako nga gihigop ang sulod sa tasa human ako makapahiluna sa paglingkod.

Siyempre una nako’ng gibasa ang mensahe sa akong pag-umangkon nga si JB. Ug subay sa ako na nga gipaabot ang una niya linya mao ang pangutana kon unsa ka tinuod ang balita nga gibinggahan ni Presidente Digong dili lang ang simbahan kon dili mismo ang Gino-o nga mao ang sentro sa pagtu-o sa mga kristiyano ug relihiyuso. Matud pa sa akong pag-umangkon nga medyo seryuso na karon:

“Good day nimo diha ‘Kol Vic. Musta sila ‘tie Nene ug ako mga ‘cousins’ nga imo mga anak. Limitado kaayo amo kontak sa ilaha. ‘Kol, ngutana ko kon unsa ka tinuod ang balita nga gisibya sa telebisyon nga kuno sa usa ka pakigpulong ni Presidente Digong diha sa ato sa Dabaw ug didto sa Cagayan de Oro gibanatan sa Presidente di lang ang mga pari ug ang simbahan katoliko ug uban nga mga Protestanteng pundo?. Ang  mismo Gino-o nga mao ang sentro sa pagtu-o sa mga relihiyon napikhan na sab ni Digong? Sumala sa among nakita ug nadunggan sa balita pinaagi sa telebisyon gitawag daw ni Presidente ang Gino-o nga ‘estupido.’ Ug sa klaripikasyon sa Presidente human manggawas ang negatibo nga reaksiyon sa mao niyang pamahayag iyang gipasabot nga ang iyang gitumong mao ang Gino-o nga gituho-an sa mga lideres sa nagkadaiyang simbahan kay matud ni Presidente ‘Kol Vic ang iyang gituoho-an nga Gino-o perpekto.

“Unya ‘Kol, samtang nagsulay sa pagklaro si Digong unsa ang iyang buot ipasabot sa iyang birada sa Gino-o gibalita pud nga iyang giporma ang usa ka pundok nga maoy iyang tahasan sa pagpakigdayalogo sa mga lideres sa simbahan sa nagkadaiyang relihiyon aron sa paghilot sa maong panagsumpaki. Ang tinuod ‘Kol Vic ako ug ang akong mga kauban nga mga Pinoy diri, lakip na ang uban namong mga silingan nga mga Pilipino, nakurat nga naminaw sa maong birada sa Presidente. Mismo ang tag-iya sa restaurant nga akong gitrabaho-an nauknol. Seguro kay sa mga Muslim man gud diri grabe ang ilang pagrespeto sa ilang giila nga Gino-o –  si Allah. Wa gyu’y mosulay sa pagsaway ug paghatag ug dili maayo nga komento sa ilang giila nga Gino-o. Ang pagbugalbugal sa ilang Allah mora ug usa ka matang sa krimen nga di gyud mapasaylo sa ilang katilingban diri sa Saudi ‘Kol Vic.”

“Ang tinuod ‘Kol Vic, sobra ang respeto sa mga Arabo kang Presidente Digong. Ila pud nga ‘idol ang ato Presidente ‘Kol bisan pa sa pagsaway sa pipila ka mga Pinoy nga di niya kaabin sa politika ug sa mga dili uyon sa iyang polisiya sa pagsanta sa illegal nga druga. Kanunay nako madunggan ang mga naamigo nako nga mga Arabong customer nga mag-ingon bilib sila sa ‘political will’ sa Presidente ug sa sistema sa pagpitol sa mga kaaway sa katilingban.  Pero nasagmuyo pud mga Arabo sa dihang nasibya ang maong balita mahitungod sa walay kukahadlok nga gilampaso ni Digong ang Gino-o nga sumala sa iyaha, mao ang gituho-an sa mga tawo nga adunay pagsupak sa iyahang kagamhanan. Matud pa sa usa nako ka suod kaayong Arabo nga ako lang ka-edad, sa Saudi ang Hari gitamod sa mga tawo nga labing taas nga opisyal nga giyukbo-an sa tanan. Ang mga Ministro sa Saudi naghangad ngadto sa Hari sanglit ang pagtan-aw sa iyaha Diyos nga ani-a sa kalibutan. Pero ang hari pud ‘Kol nagtahud ug nagtamod kang Allah nga mao ang Gino-o sa mga Muslim. Ni sa huna-huna kuno ‘kol Vic wala’y pagduha-duha ang ilang hari nga si Allah maoy labing taas ug gamhanan nga nagdala sa kalibutan ug sa tibuok uniberso. Bisan unsa nga pagpadayag ug pagduha-duha sa katakos ug sa pagka-anaa sa ilang Allah usa ka dakong krimen sa pagpanamastamas sa kabala-anon sa ilang giila nga Gino-o. Mao nga matud sa akong mga higala nga Arabo ‘Kol kurat kaayo sila sa ka-kursunada ni Digong nga mopagawas sa iyang personal nga panglantaw sa Gino-o ug sa paghatag niini ug dili angay nga deskripsiyon sa iyang ngalan – ‘estupido’.”

Sa akong huna-huna, grabe gyud ang epekto karon sa mga bag-ong teknolohiya sa komunikasyon. Unsa ang nahitabo niaanang orasa ug adlawa halos dungan pud nga mahibaw-an sa mga tawo didto sa ubang nasud sama sa Saudi. Ti-aw ba na nga kon unsa ang gipanulti sa Presidente dinhi sa Pilipinas diha-diha o basin oras lang ang diperensiya, nakita ug nadunggan na sa mga tawo lakip ang mga Pilipino nga tu-a sa gawas.

Ako dayon gitubag ang si-aw nako nga pag-umangkon:

“Dong Jibby, kon unsa inyong nakita ug nadunggan sa balita sa telebisyon gikan sa Pilipinas nga mahitungod sa gipanulti ni Presidente Digong tukma na siya. Ang posible lang nga dunay sayop ang kon gi-unsa sa pagpresentar sa nagsulat sa balita nga maoy nasibya dinha. Pero tinuod na Jib. Dunay mga pulong sama sa ‘estupido’ nga Gino-o ug ‘perpekto ang akong Gino-o.’ Kon diretsuhon sa pagsabot usa lang ang buot ipaabot nga mensahe sa Presidente: nga kon ang gipanghimo karon sa pipila ka mga tawo ug opisyales sa simbahan subay sa bibliya nga mao kuno ang tinubdan sa pagtulun-an nga gipasunod sa Diyos, ‘estupido’ ang Gino-o nga nagtudlo sa ingon. Sa ako nga pagsabot Doy, mora ug ingon niana ang buot ipasabot sa Presidente. Ang problema lang nga akong nakita sa paglitok niya niadtong pulong sa pagsaway, wa mapahiluna sa Presidente ang iyang basehanan. Mao nga di gyud masabtan ang iyang tumong bisan pa kon ang iyang gisulti nagpasabot lang nga ang mga gibuhat sa pipila ka mga lideres sa simbahan wa matukma sa angay nga pagsabot sa sugo sa Gino-o. Mao nga kon mao gyud ang tumong sa sugo sa Gino-o ang gisunod sa mga lideres sa simbahan aron itudlo ngadto sa mga tawo, ‘estupido’ ang mga sugo; entonces, ‘estupido’ pud ang nagsugo. Pero Doy, ang akong personal nga interpretasyon, ang kontrobersiya nagsukad sa dili tukma nga pagpadayag sa tinuod nga unod sa gisulti sa Presidente. Mao nga di pud tukma ang interpretasyon sa mga tawo labi na gyud ang mga lideres sa simbahan ug mga kritiko sa Presidente. Kon akong sumahon Jib, mora kini ug away nga ang hinungdan liso. Pero ang usa sa duha ka protagonista ang gihuptan liso sa mangga; samtang ang usa liso sa kasuy. Mao nga lisod gyud magtakdo ang mga argumento. Maayo na lang nga nagpa-ubos si Presidente ug nagmugna ug hugpong aron ipahiluna ang usa ka dayalogo sa nangkabangi nga mga pundok. Atangan na lang nato Jib ang umaabot pa nga mga hitabo.” SEND

-30-

Posted in Opinion