Nunot sa alisngaw sa kape | Hingpit nga pagsalig ang hinungdan

GRABE gyud ang epekto sa bag-ong teknolohiya sa dagan sa kalibutan karon, labi na gyud sa aspeto sa komunikasyon.

Ti-aw mo ba nga kaniadto lang milabay nga Martes gi-anunsiyo ni Presidente Rodrigo R. Duterte nga iya pang lugwayan sa ikaduhang higayon ang termino ni karon National Police Director General Ronald “Bato” dela Rosa abot dayon didto sa Saudi Arabia ang balita.

Kini akong nahibaw-an gikan sa labing ulahi nga e-mail nga akong nadawat gikan sa akong gwatsinanggong pag-umangkon nga si JB kon John Brian. Ang iyang e-mail akong nadawat ug nabasa wala pay tingpaniudto kaniadtong Miyerkoles, Pebrero 21, 2018. Mao kin i ang e-mail sa akong pag-umangkon:

“Maayong adlaw nimo diha ‘Kol Vic. Musta man? Didto diay mo Cebu si ‘Tie Nene? Mora ug hayahay kinabuhi diha ba kay lakawlakaw lang mo duha. (Sa akong huna-huna wa lang kabalo akong pag-umangkon unsa gyud amo giadto sa Cebu).

“Naunsa na diha sa Pinas ‘Kol; gi-extend na pud ni Presidente Digong ang termino ni PNP Chief Bato? Di ba ‘extended’ na si Bato hangtud sa Abril? Unya karon i-extend pa gyud sa wa pa’y klaro hangtud kanus-a? Swerte o’ sobra gyud salig sa Presidente kang Bato ‘Kol no kay mora na man gyud ug wa na’y lain pang opisyal sa kapolisan nga mahimong makapadayon sa iyang mandato nga limpiyohon ang hugpong? Luoy pud to mga opisyal nga nagsunod sa pwesto isip national director sa kapolisan kay mag-anam ka hanap ang ilang tsansa nga maka-abot sa kinatas-an nga ranggo sa PNP. Mora ug ang mahitabo kadtong mga tulo ka ‘star’ nga opisyal sa PNP karon makakuha lang ug upat ka bituon sa abaga sa ilang uniporme human sa ilang ‘retirement’ kay ‘automatic’ man kaha sila mosaka ug usa ka ranggo human moretiro?

“Hinuon ‘Kol basi sa imo sulti sa ako-a sa diha pa ko sa Dabaw normal lang na sa Presidente nga kon siya magtudlo ug hepe sa kapolisan nga mao ang mangulo sa serbisyo nga magpatuman sa iyang mga lakang sa pagpatunhay sa kahusay ug kalinaw sa nasud iya gyud kinahanglan ang tawo nga hingpit ang iyang pagsalig ug nga iya na kining gikatrabaho sa nanglabay nga panahon. Di ba ‘Kol si Bato nahimo na nga hepe sa Davao City Police Office kaniadto mayor pa si Presidente Digong? Sa ingon nga sitwasyon ‘Kol Vic seguro gyud si Digong nga di siya traydoron sa hepe sa PNP pinaagi sa pagsabotahe sa iyang mga programa. Gawas pa ‘Kol Vic di ba taga Sta. Cruz, Davao del Sur man na si Bato?

“Pero ikaw ‘Kol Vic, seguro ‘agree’ ka sa ako-a nga naa pud daghan diha sa mga nagsunod o di ba naambakan nga mga opisyal ni Dela Rosa nga mga kwalipikado mahimong PNP Director General? Kanunay nako madunggan sa balita sa telebisyon mao si P/General Albayalde. Tan-aw nako sa iyaha ‘Kol maayo pud siya dala sa iyang mga tawo. Naa pud siya personalidad. Kon ako pangutan-on sa tanan nga tulo na ka bituon sa ilang abaga si Albayalde ang popular sa PNP. Kon siya ibutang ni Presidente Digong wala seguro moreklamo o magbagutbot.”

Nahimuot ko sa akong nabasa nga e-mail sa karahong si JB. Unsaon nga kon kanus-a nalayo sa Dabaw diha pa nako namatikdan nga nahimo na nga seryuso sa mga isyu nga iyang gituki uban sa ako-a bisan pinaagi na lang sa e-mail. ‘Imagine’ kaniadto mobisita lang sa balay para makalibre sa kape ug ikaduha ra ang pakighisgot mahitungod sa kalambo-an sa politika ug kahimtang sa Dabaw ug sa Pilipinas! Karon, kon ang tinubdan sa mga panghitabo sa Pilipinas nga iyang masayran gikan na lamang sa mga balita sa telebisyon diha pa siya nagseryuso sa iyang kanunay nga hisgutan uban sa ako-a pinaagi sa komunikasyon. Mihigop sa ko sa nangalisgaw nga ‘civet coffee’ nga gibutang sa ako’ng Misis sa lamesa kilid sa computer dayon hinuktok kon unsaon nako pagtubag si JB. Mao ni akong tubag sa mga gipadayag nga isyu sa akong kanhi si-aw kaayo nga pag-umangkon.

“Dong JB, ‘agree’ kaayo ko sa imo nga naa daghan mga opisyal ubos ang ranggo ni PNP Chief Bato nga kwalipikado pud sama sa iyaha; nga sama kang Heneral Albayalde dako ang ilang katakos aron ipatuman ang mandato sa kapolisan subay sa programa ni President Digong. Pero nia ko ipaambit sa imoha Doy aron masabtan nimo unsa ang hinungdan ngano nga gilugwayan pa sa Presidente ang pagpangatungdanan ni PNP Chief Bato.

‘Usa ka magazine sa Great Britain naghangyo kang bilyonaryo nga si anhing J. Paul Getty sa Amerika nga isaysay sa labing mubo nga mga pulong unsa ang hinugdan sa iyang paglampos sa kinabuhi nga misangpot sa iyang pagka-adunahan. Ang tubag ni Getty subay sa hangyo sa mga editors sa magazine, Adunay mga tawo nga nakadiskobre ug tinubdan sa kurudo, ang uban wala.’

“Simpli nga pagkasulti Jibby, naa kang Bato ang hingpit nga pagsalig ni Presidente sa pagkakaron, wala pa sa uban nga mga opisyal. Pero naay panultihon nga kon gitakda sa imong kapalaran moabot ra gyud gihapon ang kahighayonan labi na kon nuntan pud sa paningkamot.”

Posted in Opinion