NUNOT SA ALISNGAW SA KAPE| Duha ka ‘e-mail,’ 3 ka managlahi’ng isyu

NIADTONG Miyerkoles sa buntag human motabang ni Misis sa pagpanglimpiyo sa mga kalat ug ubang nagkalamukat nga mga gamit sa balay human sa selebrasyon sa Pasko midalikyat ko ug abli sa “computer” aron tan-awon ang akong e-mail samtang nagkape. Nakaseguro ko nga dunay daghan mensahe nga misulod didto kasagaran mga pagpadayag sa ilang paskohanon nga mga pagtagad.

Tuod man wa gyud ko masayop. Pero duha ka e-mail and una nako nga gibuksan. Ang una mao ang gikan sa akong kamagulangan nga anak nga naa sa barko nga biyahe sa laing mga kanasuran. Sa iyang mensahe iyang gipadayag ang kamingaw kay siya nalayo sa amo-a ug nga niadtong tungora “busy” sila nga nagdiskarga sa mga “processed oil products” didto sa us aka pwerto sa South Korea. Pero matud sa akong anak nga si Sacha ang nakasamot sa iyang kalaay ma ang duh aka semana nila nga opag ankorahe kay wala sila makadip-ig sa pantalan sanglit aduna pay laing mga barko nga wala mahuman sa pagdiskarga. Mao nga inay makalarga sila balik sa Singapore ug possible nga makauli sa Pilipinas sa dili pa magbag-ong tuig di na kini mahitabo kay naukltaba man ang ilang pagdunggo ug mga katorse ka adlaw.

Matud pa sa akong anak, “Pa, nakita nako sa Facebook ang gipang post sa akong mga igsuon ug mga ig-agaw diha ang mga hulagway sa gihimo ninyo nga Christmas Party cum reunion. Mora ug lingaw kaayo mo diha sa atu-a kay dunay duha namo ka ig-agaw nga mga babaye gikan sa Dubai nga nakapauli atol sa Pasko. Unya daghan pud pagkaon ug mga pinaskohan nga gipanghatag ninyo lakip na ang gipadala ni Auntie Baby gikan sa Alabama. Gawas pa ani naa pa gyud mo ‘exchange of gifts.’ Grabe nag-enjoy mo tanan diha. Daghan pud ako nakita nga mga botelya sa beer nga nagbarog pa ug natumba na. Kinsa nagbangka ato? Sigi lang Pa, ingna si Mama pagbalik nako sa Pilipinas ug sa Dabaw magpundokpundok na pud ta puhon.

“Lain pud ato pa, naunsa na man karon ang Dabaw nga natultolan na man sa bagyo? Subay sa balita nga akong nabati ug nakita sa telebisyon sa akong kamarote, grabe nga nabahaan ang pipila ka mga dapit kilid sa Davao River. Wa pa man na niadtong high school ug college pa ko diha sa atu-a.”

Tubag nako sa akong anak, “Cha, daghan ang nangutana ngano wa ka kauli sa atu-a niadtong pasko. Naanad man gud sila imong mga ig-agaw ug barkada diri labi na to imo kauban sa banda, nga naa ka panahon sa pasko. Mao nga mora pud sila ug namingaw sa imoha. Pero ako sila giingnan nga posible nga makapauli ka sa sunod bulan. Mahitungod sa bagyo nga motapsing-tapsing na sa Dabaw, tinuod gyud na. Mora ug duol na kaayo kay didto man mohapak sa Davao Oriental, Compostela Valley, Davao del Norte, Caraga Region ug lakip na ang Bukidnon ug Zamboanga area. Pero Cha, bisan ug wa ta madirektang naigo sa kusog nga hangin, ang grabe’ng ulan didto sa Bukidnon maoy nakapa-apaw sa tubig sa Davao River. Resulta, and Tigatto, Jade Valley, Maa, ug sa may SIR area didto sa Bankerohan nalunopan. Daghan ang nangbakwet aron kalikayan ang posibilidad nga madisgrasya. Karon ang dako nga problema sa katawhan mao ang pagkaon ug tubig para sa mga gibakwet. Tinabangay ang gobiyerno ug pribadong sector aron makahatag ug relief goods labi na sa tubig. Padalhan tika diha sa barko ug ‘update’ diri sa ato-a seguro sa Domingo puhon.”

                                                                         ***********************

Unya ako na sab gibasa ang e-mail sa akong gwatsinanggong pag-umangkon nga si JB.

“Maayong adlaw nimo diha ‘Kol. Nakita nako and mga pictures nga gi ‘post’ nila Shari ug Maureen sa Facebook labot sa gihimo nga 2017 ‘Christmas Party and family reunion’ diha sa inyong balay sa Talandang. Basi sa inyong mga hitsura diha mora ug sobra mo nga nag-enjoy. Seguro daghan ug mga pinaskuhan inyong gipanghatag ug nadawat gikan sa usag-usa labi na gikan kang Auntie Baby nga tu-a sa Amerika.

“Mingaw kaayo ko diri ‘Kol sa Saudi kay wa baya Christmas diri sa akong gitrabaho-an kay mao man kana ang Muslim religion ‘Kol. Pero diha akong nakita ang mga pictures nga gi ‘post’ sa Facebook natambalan akong mingaw kay nakita nako ako Misis nga nagsayaw unya nagkupot pa gyud ug botelya sa Cali. Kita pud nako akong anak nga nagsandig sa iyaha. Unya ‘Kol daghan kaayo diay gipa raffle nga mga ‘items’ kay ingon ni Shari tanan nakadawat man sa raffle. Unya dagko pa gyud opremyo kwarta sa mga games sa kabataan ug mga may edad na. Ikaw gihapon nagbangka ato tanan ‘Kol parehas sa mga unang mga tuig sa atong Party?

“Lain pud ato ‘Kol unsa nahitabo nga nag resign man si Vice Mayor Pulong? Tinud-anay kaha to iyang resignation? Grabe no kon tinuod to nga ang hinungdan mao ang ilang personal nga away sa iyang anak nga si Isabelle. Kon kaya sa anak nga mosukol sa iyang Papa pinaagi sa pagbuhi ug mga hait kaayo nga pulong sa publiko pinaagi sa Facebook account seguro sobra ka maldita. Basin naa pud gisaligan o di ba ‘alas’ batok sa iyang Papa.

“Pero, bilib ko ni VM Pulong ‘Kol. Iya pud gitubag sa publiko ang hait nga mga pulong sa iyang anak babaye sa unang asawa. Gipagawas niya ang iyang ‘hinanakit’ pinaagi sa Facebook. Unya matud ni VM ‘Kol sumala sa mga balita nga among nabati ug nakita sa telebisyon diri sa Saudi, dili niya buot madahig ang kinatibuk-an sa iyang pamilya ug ang Presidente sa mga dili maayong nahitabo sa iyang pamilya sa unang asawa. Mao nga sa ngalan sa ‘delicadeza’ ningluwat na lang siya sa iyang pagka bise mayor. Pero, unsa na man ang estado sa maong ‘resignation’ ni Pulong ‘Kol?’

Gitubag nako si JB sa iyang e-mail:

“Merry Christmas nimo diha Doy. I-cc na lang tika sa akong tubag sa e-mail sa imong ig-agaw nga si Sacha mahitungod sa gihimo nga ‘family Christmas Party cum reunion’ sa ato pamilya diri sa among balay. Kumpleto na to Jib. Wan a pud ko magbangka sa mga gasto sa maong selebrasyon Jib. Retired na baya ko ug nagsalig na lang sa gamay nga pension ug sa kita sa pagsuklat sa mantalaan. Ang tinuod Jib, tampo-tampo nalang ang mga pamilya nato. Ang mga gipang ‘raffle’ nga mga ‘items’ gikuha kadto sa kontriobusyon sa imong mga ig-agaw diri. Salamat pud diay sa inyong paghatag ug gipalit ug lechon baboy. Ingna sila JR ug Macoy sa ‘uulitin.’

“Mahitungod sa ‘resignation’ ni Vice Mayor Jib iya to gisulti atol sa usa ka ‘special session’ sa konseho nga gipatawag ni Mayor Sara. Ang dokumento kon sinulat nga pagluwat tu-a na daw sa lamesa sa iyang Papa nga si Presidente Digong. Kon dawaton wala pay klaro. Pero ang maong sulat pahluwat sa katungdanan wala maglakip sa gitawag nga pulong ‘irrevocable.’ Buot ipasabot mahim ong madayon mahimo pud nga dili; depende sa aksiyon sa Presidente. Hinuon, sa usa ka pahayag nga gihimo sa Papa ni Pulong di kuno siya manghilabot sa desisyon sa iyang anak kay may igo na kining kabuot ug nasayud sa iyang gihimo. Mao nga ato na lang hulaton Jib. Bantayi na lang diha sa inyon telebisyon kon asa paingon kining ‘resignation’ ni VM Pulong Doy. SEND.

Posted in Opinion