NUNOT SA ALISNGAW SA KAPE| Dili matago mga panghitabo sa Pilipinas

HUMAN ang mga adlaw sa kasadya dala sa pagsaulog sa Pasko ug Bag-ong tuig, dugangan pa sa mga masulob-on nga mga panghitabo dinhi sa Dakbayan sa Dabaw halos tanan mora ug nangaluya.

Ako mismo gibati sa kalit nga pagbug-at sa kalawasan. Seguro tungod sa kulang sa tulog halos matag adlaw, way disiplinang pagkaon, duna pay higayon nga masobrahan ang inom ug makahubog nga ilimnon.

Sa laktod nga pagkasulti, ang gibati nga kaluya sa kalawasan naggikan sa paghikalimot sa pagdisiplina sa kaugalingon. Seguro naagni pud sa mga kalihukan sa mga batan-on nga halos di na mopahulay sa mga aktibidades panahon sa semana sa Pasko ug Bag-ong Tuig.

Mao nga napugos ko nga magpahulay una didto sa among balay sa bukid diin layo sa kaguliyang sa sentro sa dakbayan ug lab-as ang hangin nga maginhawa.Ang resulta nalimitahan pud ang akong mga inpormasyon sa katikaran sa dakbayan ug sa tibuok nasud sa kon unsa lang ang mabalita sa telebisyon. Unsaon, walay moabot nga mantalaan didto ug wala pa gyud signal sa celfone ug sa internet.

Mao nga sulod sa halos usa ka semana nga pahulay ang akong mga sinulat alang sa akong lindog nga “Rough Cuts” niining mantalaan gitingub kay ang mga isyu nga gituki padayon man nga gihisgutan sa katawhan.

Pagbalik nako sa balay namo sa Catalunan Grande una nako nga gihimo mao ang pag-abli sa akong e-mail kay basin dunay daghan nga mga mensahe nga angayan nako matubag. Milagro kay tulo lang ka mga e-mail messages ang naa ug walay gipadala ang akong karahong pag-umangkon nga si JB nga tu-a sa Saudi Arabia.

Hinuon, dako akong kalipay kay dunay e-mail ang kong anak kamagulangan nga usa ka tripulante sa langyawng barko kansang “headquarters” tu-a sa Denmark.

Matud pa sa mensahe sa akong anak nga si Sacha, “Good PM nmo dha pa! Musta man ang Pasko ug Bag-ong Tuig. Basi sa mga gipang post sa Facebook nila Shari ug Maureen akong nakita nga sadya kaayo ang inyong pagsaulog sa Pasko. Bisan ug gimingaw ko dha lipay na lang ko kay mora ug daghan sa akong mga ig-agaw nga didto sa laing nasud nanarbaho nakapauli man.

“Lain pay ato Pa, naa mi karon sa tunga-tunga sa West Philippine dili layo sa Palawan. Paingon mi sa Singapore ug posibli nga human sa among pagdiskarga didto sa among mga kargamento makapauli na ko diha sa Pilipinas. Pero dili ko kadiretso sa Cebu ug sa Davao kay kinahanglan pa nako asikasuhon ang akong mga papeles didto sa among opisina sa Makati. Medyo taud-taud una ta magkita-kita uban sa akong mga manghud. Labi na karon Pa nga wa maka ‘full speed’ ang among barko kay dili maayo ang lakaw sa panahon diri sa West Philippine Sea tungod sa bag-o lang milabay nga bagyo’ng Vinta ug nagsunod pa gyud si bagyong Agaton. Pastilan, mora ug kanunay giduyan ang among barko tungod sa dagkong bawud.

“Pa, nasubo pud ko sa nahitabo nga sunog sa NCCC Mall. Usa niadtong biktima, ang labing ulahi nga nakuha ang sunog nga lawas, si Alexandra Moreno, nakaila ko ato kay barkada namo ni Achill (manghud ni Sacha) and iyang magulang lalake. Mora ug duha ka semana una nakita ang iyang lawas. Ug kon tinuod ang balita mora ug dunay kamatuoran nga usahay ipaagi sa damgo sa mga suod nga paryente ang pagtultol sa nahimutangan sa namatay. Akong pahasubo sa iyang pamilya.

“Lain pud ato pa, ningtubag pud ang sunog sa Cebu human maugdaw ang Metro Department Store sulod sa Ayala Center Mall. Dli layo ang balay sa akong ugangan didto ug kasagaran didto mosuroy ang akong Misis kon walay lingaw sa balay. Basi sa akong nabalitaan diri sa barko mora ug gihasol ang pagkatapos sa 2017 ug ang pagsulod sa 2018 sa mga insidente sa sunog. Mga dagkong komersiyal nga mga establisemento ang naugdaw, daghang kabalayan ang nagapaig ug daghang mga kinabuhi ang nahanaw tungod sa kalayo. Ambot unsa kaha ang naghulat sa Pilipinas sa mosunod nga mga bulan sa tuig 2018. Kay subay sa mga kasinati-an ang tuig nga pagasugdan ug dimalas makabaton usab ug daghan nga mga kaayohan. Usa na nga timailhan nga akong nabalitaan Pa mao ang grabe nga taas sa pagbaligya ug pagpamalit ug mga “stocks” sa mga dagkong kumpaniya atol sa labing ulahi nga adlaw sa ‘stock trading’ sa tuig 2017, ug sa mao gihapon nga kusog nga pinalitay sa mga ‘stocks’ sa unang ‘trading day’ sa Philippine Stock Exchage sa tuig 2018. Ingon pa sa among Kapitan sa barko nga Danish nga kuno wa panumbalinga sa mga mamuhunang mga negosyante ang mga negatibong komento sa mga langyaw nga gobiyerno mahitungod sa pagpadagan sa atong nasud. Lipay pud ko sa iyang gisulti Pa kay taga Davao baya si Duterte. Pero ako siya gitubag nga nanghinaout ko mausab ang pagtan-aw sa ilang gobiyerno sa atong nasud. Sakop baya ang Denmark sa European Union.

-oOo-

Medyo taas kaayo ang mensahe sa akong anak. Pero kay wa man pud e-mail message si JB nga iyang ig-agaw. Ako siya gitubag sa mubo kaayo:

“Cha, salamat sa imong mensahe ug sa posibilidad nga makapauli ka sa Pilipinas sa mga ikaduhang semana sa Enero 2018. Hinaut nga dali lang nimo maasikaso ang imong mga papeles sa barko aron di ka madugay didto sa Manila.

“Mahitungod sa unod sa imong e-mail ato na estoryahan ug maayo pag-abot nimo diri. Kay kon ato nga tuki-on sa husto ang mga panghitabo nga imong gihisgutan mahurot atong oras atubangan sa computer. Hulat na lang mi sa imo diri sa Davao. Ayaw kalimot sa among pasalubong diri. Ayaw lang na’ng oil gikan sa Bahrain. SEND.

Posted in Opinion