NUNOT SA ALISNGAW SA KAPE| Basin masakripisyo ang mga bihag

     HUMAN ako makabalik sa balay sa downtown gikan sa umahan sa pamilya didto sa Bukid sa Talandang kaniadtong Miyerkules sa hapon una nako’ng gihimo mao ang pag-abli sa computer ug gisusi kon duna ko’y nadawat nga e-mail.

     Wa ko masayop. Naa gyud ug gikan sa akong karaho nga pag-umangkon nga si JB. Tua siya sa Saudi aron mangita ug kabuhi-an alang sa iyang pamilya. Ang tonto nagyaga-yaga pa gyud. Matud pa niya:

     “Kumusta man ka diha sa Dabaw ‘Kol? Balita nako hayahay naka kaayo. Mora ug permi bugnaw ang hangin didto sa imong balay sa bukid. Pero basi sa balita nga akong madungog sa telebisyon init man daw diha sa Pinas ‘Kol bisan pa ug sa ubang bahin sa nasud kanunay bagyo ug baha. Seguro ‘Kol, kung bugnaw ang imong paminaw wa ka na magsinena o di ba hinuon buslot-buslot na imo t-shirt. Kay ako man gud nabalitaan gikan sa akong manghud ‘Kol nga ingon daw ka di na kinahanglan mopalit ug sinena kay di na kuno ka sige ug lakaw kay tingub-tingob daw imo sulat sa imong column. Mao nga siguro wa   na ka maghuna-huna ug papogi kay ‘retire’ na kuno ka sa pagka ‘playboy.’

     (Sa akong huna-huna ‘bu-ang ning bataa ni. Mora ug propeta; nakatagna sa akong kahimtang dinhi sa Dabaw. Maayo pud mosagap ug balita ang karaho’).

     “Bitaw ‘Kol, ‘joke’ lang ni ako. Balo ko simpli man lang kang tawo. Panagsa ra man ka manghambog. Di man ka parehas sa mga opisyales sa military ‘Kol nga karon wa pa gyu’d klaro kon kanus-a mahuman ang giyera sa Marawi. Kurat man gud ko ‘Kol kay sa miaging mga bulan pa ilang gibutyag nga kuno di na madugay ug matapos na gyud ang gubat diha sa Marawi. Gani ‘Kol, diha pa ilang giluwatan nga pahayag nga kuno ang giyera naa na lang sa kinatibuk-an nga 600 ‘square meters’ nasentro. Sa akong pagsabot ‘Kol mag ‘eyeball’ na ang mga sundalo ug mga terorista. Pero kaniadtong Miyerkoles niining semanaha nablitaan nako diri sa Saudi ‘Kol nga mahuman na pud ang giyera sa Marawi sulod sa duha ngadto tulo ka semana. Kini nga balita ‘Kol gikutlo pud gihapon gikan sa militar. Mao nga naglibog na hinuon ko unsa man gyud ang tinuod.

     “Unya ‘Kol, naa pa’y estorya nga mga 50 ngadto 60 na lang ka mga armadong terorista ang nakigbaylo-ay ug bala sa mga sundalo. Pero kini nga taho migawas kaniadto pang sobra duha ka semana ang milabay. Duda na hinuon ko ‘Kol nga basin naay anting-anting ang mga terorista kay mora man ug di seguro sila madutlan ug bala kay hangtud karon wa pa man gyud sila mahurot. Wa pa gani undang ang pagbomba sa lugar gikan sa kahanginan ug pagkanyonaso sa mga ‘building’ nga kuno gitago-an sa mga Maute diha sa ubos. Grabe na gyud akong duda ‘Kol sa abilidad sa mga terorista ug mga kaanib nila nga kuno mga Indonesian, Malaysian ug Arabo. Sobra gyud ilang ka maayong laki sa ‘urban warfare’ ‘Kol, di ba?

     “Labaw sa tanan ‘Kol, naglisod ko ug huna-huna sa kadaghan sa mga bala ug armas sa mga bandidio. Kay kon atong makita ang mga ‘footages’ sa bakbakan ug madungog ang buto-buto wala’y undang, buntagay ang pinusilay. Buot ba ipasabot ani ‘Kol nga sobra ka maayong kalidad sa ilang mga armas kay wa man gyud ni mangadaot sa way undang nga pabuto. Unya kon buntagay ang pinusilay sobra-sobra ka daghan sa ilang mga bala. Huna-hunaon na lang nato ‘Kol nga mag-upat na ka bulan ang giyera ug mora’s wa man gyud kutat sa ilang ‘supply’ sa bala ug armas ingon man mga ‘explosive devices.’

     “Sa kabahin sa kasundalohan sa gobiyerno pila na ka batalyon ang tu-a didto. Gani lain na usab nga grupo sa mga ‘special forces’ ang ipadala didto aron pag-dugang sa nakiggubat batok sa mga terorista.

Mora ug klaro na hinuon ‘Kol nga na ‘under-estimate’ sa kagamhanan ang kapasidad sa mga teroristang grupo.”

     Nahimuot kaayo ko nga nagbasa sa e-mail sa gwatsinanggo nakong pag-umangkon nga si JB. Unsaon nga inay sa ako magpakisayud siya na man hinuon tighatag sa ako-a ug ‘update’ sa kahimtang sa gubat didto sa Marawi. Unya tukma pud ang iyang mga nabalitaan. Grabe na gyud ang bag-ong mga teknolohiya sa paghatud ug mga balita sa bisan asa nga dapit sa nasud ug sa tibuok kalibutan. Mao nga ang akong tubag sa iyaha:

     “Doy, mora na man hinuon ug ‘war analyst’ na ka diha sa Saudi? Mas una ka pa nga makabalita sa ako-a mahitungod sa katikaran sa giyera diri sa Marawi.

     “Pero husto gyud na tanan imong gisulti sa ako-a Jib. Taud-taod na nga gihisgutan sa militar nga hapit na mahuman ang giyera didto sa Marawi ug nga gamay na lang ang gilihukan sa mga terorista ug posibli nga mahurot sila kon dili mo-surrender. Pero hangtud karon sige pa gihapon ang binombahay ug pagkanyon sa militar sa pwesto sa mga Maute. Hinuon Doy, kasabot ko sa babag sa kasundalohan sa pagtibway sa ilang kontra. Unsaon nga hangtud karon naa pa kuno’y mga 40 ngadto sa 50 ka mga sibilyan nga mga bihag. Ug kini giampingan gyud nga dili maangin sa pinusilay.

     “Sa akong panlantaw Jib. kon kinahanglan na gyud tapuson ang giyera ug nga ang nahibilin nga babag mao ang mga bihag, dili layo nga isakripisyo na lang segurio sa gobiyerno ang maong mga sibilyan. Lain pang posbleng bakwi-on nga mando mao ang dili pagbomba sa mga mosque kon alampo-anan sa mga Muslim. Manghinaot lang ta Doy nga di moabot ani nga sitwasyon. SEND.

Posted in Opinion